Një aksident është regjistruar mbrëmjen e djeshme në qendër të qytetit të Beratit. Raportohet se një mjet tip “Renault” me targa AB 906 AR, që drejtohej nga një 27-vjeçar, i dehur në timon, pasi ka përplasur dhe hedhur në ajër në afërsi të “Urës së Varur” një motoçiklist që shpërndante pica, ka “fluturuar” më pas në rrugën përgjatë lumit duke përplasur 4 mjete të parkuara në rrugë.
Makina e drejtuar prej 27-vjeçarit më pas ka përfunduar brenda lulishtes së qytetit. Drejtuesi i motoçikletës, që pas përplasjes është shembur në asfalt, një 33-vjeçar, raportohet se është plagosur rëndë dhe është transportuar me urgjencë drejt spitalit rajonal të Beratit.
Drejtuesi i mjetit që shkaktoi aksidentin, Tajar Hysko, ka dalë pa lëndime nga makina dhe është ndaluar nga policia.
Si pasojë e aksidentit përveç plagosjes së rëndë të drejtuesit të motorit të picave, edhe 4 mjetet e parkuara në rrugë janë shkatërruar.
