Dy të vdekur dhe një person i plagosur rëndë është bilanci i një aksidenti të ndodhur orët e vona të kësaj pasdite në në autostradën Milot-Fushë Krujë. Erald Uzuni, 26 vjeç dhe Klodian Vladi 21 vjeç, kanë mbetur të vdekur. Ndërsa, M.U. 18 vjeç, ndodhet në gjendje të rëndë shëndetësore në spital.
Policia bëri me dije se “rreth orës 19:58, është marrë njoftim se në autostradën Milot-Fushë Krujë, një mjet tip Volkswagen me targa AA 744 NJ, ka dalë nga rruga”.
“Për pasojë janë dëmtuar drejtuesi i mjetit si dhe 3 pasagjerët të cilët janë dërguar në Spitalin e Traumës në Tiranë, ku drejtuesi i mjetit shtetasi E.U. (Erald Uzuni) 26 vjeç, banues në Tiranë dhe njëri nga pasagjerët shtetasi K.V. (Klodian Vladi) 21 vjeç, banues në Tiranë, kanë ndërruar jetë në spital.
Ndërsa 2 pasagjerët e tjerë, shtetasit M.U. 18 vjeç banues në Tiranë dhe shtetasi A.C. 23 vjeç, ndodhën nën kujdesin mjekësor, njofton Policia. M.U. ndodhet në gjendje të rëndë shëndetësore, kurse A.C. është jashtë rrezikut për jetën”, njoftoi Policia.
Grupi hetimor ka shkuar në vendngjarje dhe po punon për zbardhjen e plotë të shkaqeve të aksidentit.
