Mbyllja e shteteve si pasojë e koronavirusit ka bërë që mungesa e turistëve të ndjehet edhe në Afrikë e Jugut. Atje, kafshët e egra tashmë janë bërë “zot” në habitatin e tyre dhe jo vetëm, por edhe në rrugët automobilistike aty ku nuk ka lëvizje të makinave. Në disa foto të shkrepura në Parkun Kruger nga një patrullë policie duken qartë disa felinë dhe luanë që zakonisht gjatë orëve të ditës fshihen në pyll, por duke parë që nuk ka prezencë të turistëve ata kanë përfituar dhe kanë “marrë një sy gjumë” në asfalt.
Parku është mbyllur më 25 mars dhe kjo pamje është e rrallë për këtë hapësirë që vizitohet nga një numër i lartë turistësh. Ndërkohë që zakonisht felinët dhe luanët i sheh të dalin në rrugë vetëm gjatë natës.
“Normalisht duhej të ishin duke pushuar nëpër shkurre për shkak të trafikut, por duke qenë se janë kafshë inteligjente po e shijojnë lirinë pa njerëz”, tha një përgjegjës i Parkut. Duket se nga e gjithë kjo situatë izolimi e botës, ata që po përfitojnë shumë nga mbyllja e njerëzve janë kafshët dhe natyra.
