Ministri britanik i shëndetësisë Matt Hancock ka njoftuar pak më parë dorëheqjen, pasi siç pritej nuk mundi t’i rezistonte skandalit të aferës intime me vartësen e tij në ambjentet e postit publik, për më tepër në shkelje falgrante të rregullave të disancës sociale prej pandemisë së Covid-19.
Hancock ishte kapur në kamera duke u puthur nxehtësisht me sekretaren e tij, për të cilët mediat thonin sot se kishin një “marrdhënie sekrete” që e dinte i gjithë stafi i tyre.
Ministri dhe e dashura e tij jane te dy te martuar.
Pamjet e publikuara fillimisht nga tabloidi britanik “The Sun” tregonin Hancock duke u puthur e u prekur në mënyrë intime me ndihmësen Gina Coladangelo, të cilën vetë ai e kishte punësuar vitin që shkoi.
Ministri dje kërkoi ndjesë për shkeljen e rregullave të distancimit të cilat ironikisht vetë kishte ndihmuar të hartonte, dhe tha se “i vjen keq” që theu besimin e vendit. Kryeministri Boris Johnson kishte pranuar ndjesën e Hancock duke e deklaruar çështjen “të mbyllur”.
Por thirrjet për largimin e tij u shumëfishuan në media e online, veçanërisht per faktin se Hancock vitin e kaluar mbështeti dorëheqjen e epidemiologut Neil Ferguson, këshilltarit të qeverisë që edhe ai u kap duke u përqafuar me të dashurën e tij të fshehtë të martuar, duke shkellur rregullat e koronavirusit që vetë hartonte.
Hancock i cili ka tre fëmijë, tha në letër se në këtë kohë “është nevoja të qëndroj me familjen.”
