Ministri i Brendshëm, Sandër Lleshaj ka reaguar ashpër pas akuzave politike nga opozita lidhur me abuzimin seksual ndaj një 14-vjeçarje në Kavajë nga një grup bashkëmosharatësh të saj. Përmes një postimi në rrjetet sociale, Lleshaj shkruan se rasti i minorenes është trajtuar menjëherë dhe me përparësi nga Policia e Shtetit. Deklaratat politike lidhur me këtë çështje Lleshaj i konsideron neveri.
Postimi i Lleshajt
S’ka më fjalë shqipe për monstrën që nuk njeh asnjë cak dhe ndot çdo gjë me gjuhën e tij! Rasti fatkeq i minorenes së dhunuar është trajtuar menjëherë dhe drejt nga Policia e Shtetit.Të tjerat janë poshtërsi. Ky e ata që bëjnë politikë apo audiencë me viktimën meritojnë neveri.
Reagimi i ministrit të Brendshëm vjen pas akuzave të ish-kryeministrit Sali Berisha i cili sot u shpreh në rrjetet sociale se policia e Kavajës kishte liruar abuzuesit e vajzës me urdhër nga lart dhe ishte përpjekur të fshihet ngjarjen. Edhe deputetë të opozitës, si të PD ashtu edhe të LSI, i mëshojnë këtij qëndrimi, duke hedhur akuza në adresë të Policisë së Shtetit.
