Kryeministri Rama ka konfirmuar mbrëmjen e sotme se Presidenti Ilir Meta ka kërkuar që të ndryshohet Reforma në Drejtësi, në takimin që ka patur në Pallatin e Brigadave me kruen e PD Basha dhe aleatët opozitarë. Për këtë tha Rama, janë vënë në dijeni dhe ndërkombëtarët nga vet Meta.
“Ndërkombëtarëve iu është kërkuar ndryshimi i Reformës në drejtësi nga presidenti Meta. Nuk ka nevojë të di më shumë për këtë.
Por gjithë kjo përpjekje për të ndërtuar qarkun e dytë ka synuar të njëjtën gjë që kemi parë edhe më 2017, me 2019, krijimin e një carje të madhe nga pikëpamja e procesit politik, vënia në diskutimin të reformës zgjedhore dhe kthimin pas të reformës në drejtësi.
Të gjitha janë të lidhura bashkë. Pa diskutim. Parlamenti nuk urdhërohet nga Lulzim Basha, sepse Basha është thjesht qytetar në raport me parlamentin.
Nuk ka tagër t’i thotë parlamentit bëj këtë e atë, sepse parlamenti është sovran e ligjitim. Ata atje i ka sjellë Lulzim Basha. Parlamenti do marrë cdo vendim edhe për reformën në drejtësi, në koordinim me SHBA. Tundimi kundër reformës në drejtësi duke bërë cmos i kemi parë, por janë të gjitha gjëra që nuk do japin rezultat”, tha Rama.
Ndërkohë, pasditen e sotme ambasadorja e SHBA në Tiranë Yuri Kim ka bërë një deklaratë të fortë, duke thënë se ka zëra për një marrëveshje prapa krahëve për të vrarë Reformën në Drejtësi, zëra për të cilët ambasadorja tha se shpresonte të mos ishin të vërtetë.
“Shpresoj që fjalët për një marrëveshje prapa krahëve për të vrarë reformën në drejtësi në Shqipëri të mos jenë të vërteta.
Reforma është e dhimbshme, e ngadaltë & jo perfekte por është e nevojshme, po bën përparim & duhet të vazhdojë,” deklaroi Yuri Kim, por nuk përmendi emra.
