Parlamenti Europian ndryshon deklaratën për zhvillimet politike në Shqipëri lidhur me reformën zgjedhore duke e zbutur qëndrimin. Pasditen e së enjtes tre eurodeputetët, kryetari i Komisionit për Punë të Jashtme David McAllister, raportuesja për Shqipërinë Isabel Santos dhe kryetari i Delegacionit të Parlamentit për Shqipërinë Manolis Kefalogiannis shpreheshin se cdo ndryshim i marrëveshjes së 5 Qershorit (pas nismës për hapjen e listave dhe koalicionet) pa konsensus me të gjitha partitë mund të rrezikojë konferencën e parë ndërqeveritare për negociatat e anëtarësimit.
“Çdo modifikim i marrëveshjes pa arritur një konsensus me të gjitha partitë politike mund të rrezikojë thirrjen e konferencës së parë për negociatat e anëtarësimit, dhe për këtë arsye të ngadalësojë procesin e integrimit evropian”. Kjo deklaratë u hoq pasditen e djeshme vetëm, por sot në mëngjes është rivendosur me një ndryshim duke zbutur qëndrimin.
Në deklaratën e re theksohet se është e rëndësishme që të ruhet dialogu dhe konsensusi me të gjitha partitë politike. “E rëndësishme të arrihet një marrëveshje, të ruhet dialogu dhe konsensusi me të gjitha partitë politike, në mënyrë që të mund të thirret konferenca e parë për negociatat e anëtarësimit, dhe të vazhdojë procesi i integrimit evropian”. Pra nga kërcënuese, deklarata sot është bërë këshilluese që të ruhet dialogu dhe konsensusi.
