Sekretari për mediat në PS, Alfred Peza, njëkohësisht anëtar i Kryesisë socialiste, deklaroi se në 30 korrik do të merret vendimi për kërkesat e opozitës për lista të hapura dhe ndalim të koalicioneve zgjedhore.
Ai komentoi zhvillimet e fundit për reformën zgjedhore në studion e lajmeve në “Vizion Plus”. Peza tha se socialistët kanë një vendosmëri për ta miratuar dhe zbatuar deri në fund marrëveshjen e arritur midis palëve dhe me ndërhyrjen e ndërkombëtarëve.
“Shqiptarët do të votojnë për atë sistem apo për atë mënyrë të të zgjedhurit të dpeutetëve që do të vendoset në 30 korrik, kur është caktuar për tu marrë në shqyrtim Kodi i ri Zgjedhor, që është dakordësuar në tryezën politike. Nga ana tjetër, kemi edhe 3 kërkesa të dy grupeve të opozitës së re parlamentare, për hapjen e listave për të mos lejuar koalicionet zgjedhore. Mbetet për tu parë sesi do të shkojë vendimmarrja në këtë datë. Shqiptarët kanë zgjedhur edhe deputetë në sisteme të ndryshme elektorale, nëse do të hapen listat edhe në këtë mënyrë do të votojnë.”
