Kasaforta e Drejtorisë Rajonale e Shërbimeve të Transportit Rrugor (DRSHTRR) në Kashar është vjedhur gjatë natës.
Ka qenë pastruesja ajo e cila ka njoftuar vjedhjen në polici.
Dyshohet se vjedhja është bërë nga dy persona, ende të paidentifikuar. Pas këqyrjes së kamerave të sigurisë është parë se kanë qenë dy autorë dhe janë larguar me një mjet me ngjyrë të zezë. Janë identifikuar targat e automjetit dhe po punohet për të identifikuar kujt i përket.
Mësohet se në kasafortë kanë qenë rreth 509 mije lekë. Dyshimet janë se autorët kanë pasur informacion për zyrën ku ndodheshin paratë. Nga ana tjetër paratë janë tërhequr nga personat përgjegjës pasditen e djeshme duke mos lënë shuma të mëdha.
Deri më tani janë shoqëruar 10 persona, një pjesë e të cilëve janë punonjës së drejtorisë. Nga ana tjetër janë edhe persona që për policinë janë me precedent të mëparshëm penal.
Njoftimi i policisë:
Tiranë/Informacion paraprak
Me datë 24.06.2020, rreth orës 07:45, është njoftuar salla operative se gjatë natës, në Kashar, dy persona ende të paidentifikuar dyshohet se kanë vjedhur kasafortën e një objekti.
Grupi hetimor dhe shërbimet e Policisë ndodhen në vendngjarje dhe vijon puna për zbardhjen e rrethanave të ngjarjes, si edhe për identifikimin dhe kapjen e autoreve. /
