Kreu i PD Lulzim Basha është takuar sot me banorët e Zall-Bastarit dhë është njohur nga afër me problematikat që shqetsojnë banorët e zonës dhe pamundësinë e tyre për të nxjerrë në treg prodhimet e tyre.
Basha thotë se në 7 vite kryeministri Rama përkeqësoi jetën e banorëve të Zall-Bastarit dhe sot ata janë në luftë për mbijetesë. “Ne nuk mund dhe nuk do ta lëmë mundin dhe djersën e banorëve të Zall Bastarit të shkojë dëm e fëmijët e tyre të vuajnë edhe për ushqimin e përditshëm”, shkruan Basha, ndërsa thekson se një Shqipëri në punë ëhstë prioriteti kryesor i tij dhe i PD.
Shkrimi i plotë i Bashës:
Sot u takova me banorë të Zall Bastarit, të cilët e kanë të pamundur të sigurojnë mbijetesën. Me ato pak të ardhura që nxjerrin me mund dhe djersë, u duhet të paguajnë dritat, ujin apo të blejnë ilaçe. Dëgjova me dhimbje se si një zonjë kishte ndërprerë mjekimin nga pamundësia për të blerë ilaçet. Rrugët e amortizuara, çmimet e rritura të naftës, farërave, plehrave kimike, po ua bëjnë të pamundur punimin e tokës këtyre banorëve, ndërsa nuk kanë marrë asnjë mbështetje nga shteti.
Në 7 vite, RAMAVIRUSI e përkeqësoi jetën e këtyre banorëve, të cilët sot janë në luftë për mbijetesë.
Ne nuk mund dhe nuk do ta lëmë mundin dhe djersën e banorëve të Zall Bastarit të shkojë dëm e fëmijët e tyre të vuajnë edhe për ushqimin e përditshëm.
Paratë e planifikuara për pesë oligarkët do të shpërndahen për investimet që përmirësojnë jetën e qytetarëve tanë në çdo cep të vendit. Në planin tonë, 50 milionë euro do të shkojnë për investime në infrastrukturën bujqësore.
Ne planifikojmë të investojmë në infrastrukturën rrugore të fshatrave që t’iu sigurojmë aksesin në tregje. Është detyrë e një qeverie të përgjegjshme që përmes buxhetit të shtetit, të garantojë bukën, ujin dhe dritat për qytetarët e saj dhe ne do ta bëjmë këtë.
Është kriminale t’iu marrësh çdo muaj taksat e tarifat qytetarëve dhe në ditën e tyre më të vështirë t’i braktisësh. Ne do të marrim të gjitha vendimet për t’iu mundësuar fermerëve të punojnë dhe të fitojnë përmes punës së tyre.
Një Shqipëri në punë është prioriteti kryesor i imi dhe i PD dhe për këtë qëllim do të bëjmë gjithçka.
