Regjisori Edmond Budina ka folur me tone mjaft të forta sot në lidhje me shembjen e Teatrit Kombëtar.
I ftuar në Abc e Mëngjesit, Budina shigjetoi edhe kryebashkiakun e Tiranës, Erion Veliaj, deklaratat e të cilit i cilësoi të turpshme.
“Në mënyrë të turpshme dy ditë më parë kryebashkiaku tha të ruajmë pasurinë kombëtare…se për Teatrin do flasim nga vjeshta…por për dy ditë u harruan të gjitha.
Erdhen e shemben duke varrosur kostume, piktura, bashkë më zërin e Naim Frashërit dhe Ndrek Lucës që qanin.
Këta të vrasin natën e të qajnë ditën. Nuk kanë më skrupuj, gjithcka e bëjnë për interesa personale, nuk iu intereson zhvillimi i vendit, duan vetëm të riciklojnë paratë e tyre të pista”-tha Budina.
Më tej, ai hodhi dyshime të forta se kjo është pikërisht arsyeja e heshtjes nga ana e përfaqësive diplomatike.
“Këtu është një dakordësi për të ricikluar paratë e pista dhe kjo më bën të dyshoje se është arsyeja e heshtjes së trupës diplomatike dhe nuk kam frikë ta them.
Këtu ndërtohet pa fund, është një makth drejt betonit, por kush do i blejë , shqiptarët nuk kanë para. Shqiptarët nuk mund të lejojnë të mbulohen nga betoni, mos të rrinë kokë ulur, zëri i tyre me çdo kusht duhet të ndihet”-u shpreh Budina.
Një akuzë e tillë e regjizorit Budina është në të njejtën gjatësi vale me deklaratën e Presidentit Ilir Meta në vigjilje të tubimit të 2 marsit në bulevard kundër “puçit të shtetit” nga kjo mazhorancë.
“Asnjë habi për hapat pas që Shqipëria ka bërë edhe në këtë drejtim. Ndaj në 2 mars të gjithë në Bulevardin “Dëshmorët e Kombit” në mbrojtje të Kushtetutës dhe integritetit të Gjykatës Kushtetuese, për të rivendosur sistemin e llogaridhënies publike në çdo nivel vendor dhe qendror, në të gjithë vendin.
Shqipëria nuk do të jetë më lavatriçe e pastrimit të parave të organizatës ndërkombëtare. Bashkë për Kushtetutën! Bashkë për Shqipërinë!”, deklaronte Meta para më shumë se dy muajsh!
