Të paktën 14 punëtorë emigrantë që po flinin në shina humbën jetën të premten pasi u përplasën nga një tren mallrash që transportonte benzinë dhe naftë nga Nanded në Manmad.
Aksidenti ndodhi rreth orës 5.30 të mëngjesit në fshatin Gadhejalgaon në rrethin Aurangabad të Maharashtra-së .
Pesë prej tyre shpëtuan me lëndime dhe janë dërguar në spital.
Burimet informuan se këta punëtorë migrantë po punonin për një fabrikë të madhe çeliku në rrethin fqinj Jalna.
Për të shmangur policinë në autostrada gjatë kthimit në shtëpi, punëtorët zgjodhën shinat hekurudhore që shkonin në Aurangabad.
Pasi ecën për disa kilometra, ata vendosën të pushojnë në shinat hekurudhore midis Satana dhe Karmad, përpara se të rifillonin udhëtimin e tyre të premten në mëngjes.
“Punëtorët emigrantë po ecnin për t’u kthyer në shtëpitë e tyre në Mandia Prandes kur vendosën të pushonin në shina. Një tren i goditi ata në orët e para të mëngjesit. Pasi pa punëtorët në shina, shoferi i trenit u përpoq ta ndalonte atë, por i goditi ata midis stacioneve Badnapur dhe Carmand” tha një oficer i policisë.
Kryeministri Narendra Modi ka shprehur pikëllimin për aksidentin tragjik.
Me dhjetëra e mijëra njerëz në Indi, pasi humbën vendin e punës në qytet, iu janë drejtuar fshatrave të lindjes, që të mund të punojnë atje, për shkak të Covid-19, raporton Reuters.
Ministria për Hekurudhat tha se për rastin është hapur edhe një hetim.
Trafiku i trenave të pasagjerëve është pezulluar në Indi që nga fundi i marsit, por trenat e mallrave vazhdojnë të funksionojnë.
Shtetet e Indisë kohët e fundit caktuan trena speciale për të transportuar punëtorë të bllokuar nga shtëpitë e tyre.
Por ndonjëherë ata nuk janë në gjendje të paguajnë biletën dhe përpiqen të kthehen në këmbë duke ecur ndonjëherë edhe qindra milje larg.
Deri më tani në Indi janë regjistruar 56.342 raste pozitive me Covid-19 dhe 1.886 vdekje, ndërsa bllokimi u zgjat deri në 17 maj.
