Presidenti i Kosovës, Hashim Thaçi i është nënshtruar ditën e sotme një operacioni (intervenimi kirurgjik).
Lajmin e bën të ditur presidenca, ndërkohë që njofton se operacioni ka përfunduar me sukses. Momentalisht ai ndodhet nën kujdesin e personelit mjekësor.
“Presidenti i Republikës së Kosovës, Hashim Thaçi, sot pasdite i është nënshtruar një intervenimi kirurgjik endourologjik në Klinikën e Urologjisë në Shërbimin Spitalor Kliniko-Universitar të Kosovës.
Sipas personelit mjekësor, operacioni ka qenë i suksesshëm dhe presidenti është nën kujdesin e vazhdueshëm të personelit mjekësor profesional. Pas përfundimit të këtij intervenimi, presidenti Thaçi është shprehur mirënjohës për profesionalizmin dhe kujdesin e stafit profesional në Klinikën e Urologjisë dhe në tërë SHSKUK-në”, shkruhet në njoftim.
