Presidenti i Rusisë, Vladimir Putin ka thënë se shpërthimi i djeshëm në një market në Shën Petersburg që la së paku 10 persona të lënduar, ka qenë një sulm terrorist.
Një ditë pas sulmit, për të cilin autoritetet thanë se është bërë me një bombë të improvizuar, Putin foli ashpër duke thënë se forcat e sigurisë “duhet t’i likuidojnë” menjëherë terroristët e dyshuar nëse ata paraqesin kërcënim serioz.
“E dini se dje në Shën Petersburg është kryer një sulm terrorist,” ka thënë Putin gjatë një ceremonie për ndarjen e medaljeve për ushtarët që kanë marrë pjesë në operacionet ruse në Siri.
Zëdhënësja e një Komisioni për Hetime, Svetlana Petrenko, ka thënë të mërkurën se “bomba e bërë në shtëpi” ka shpërthyer me një fuqi të barazvlefshme me 200 gramë të TNT-së [një material shpërthyes].
Por, forcat e rendit fillimisht kishin nisur hetimet për dyshime rreth një vrasje, duke sugjeruar se nuk dyshojnë për motive terroriste prapa shpërthimit.
Rusia e quan fushatën e saj ushtarake në ndihmë të qeverisë siriane, si “veprim kundër terrorizmit”, dhe Putin tha se ushtarët që kanë shërbyer në Siri kanë ndihmuar në shmangien e sulmeve potenciale, duke vrarë ekstremistët dhe duke i parandaluar ata që të kthehen në Rusi.
“Çfarë do të ndodhte nëse këta mijëra…kthehen në vendin tonë – kthehen të trajnuar, të armatosur dhe të përgatitur mirë?”, ka thënë ai gjatë ceremonisë, duke iu referuar rusëve që kanë shkuar në Siri për të luftuar përkrah grupit militant, Shteti Islmaik dhe grupeve të tjera terroriste.
Zyrtarë rusë thanë të mërkurën se nëntë nga 10 të lënduarit nga shpërthimi janë dërguar në spital për trajtim mjekësor. Së paku një person ka qenë në gjendje të rëndë shëndetësore, ndërsa një tjetër është liruar nga spitali.
Shpërthimi ndodhi pasi autoritetet e sigurisë thanë më 15 dhjetor, se kanë arrestuar shtatë persona të dyshuar si ekstremistë islamikë, të cilët po planifikonin sulme me bomba në një kishë dhe në vende të tjera në Shën Petersburg.
FSB ka thënë se dyshohet që të arrestuarit janë anëtarë të grupit militant, Shteti Islamik dhe se ata po udhëzoheshin nga jashtë përmes mesazheve në aplikacionin Telegram.
Pas arrestimeve, Putin kishte telefonuar Presidentin e Shteteve të Bashkara, Donald Trump, për ta falendëruar atë, për sië kanë thënë zyrtarë rusë, këshillën e CIA-së që ndihmoi për të parandaluar sulmet në Shën Petersburg./REL.
