Edhe pse janë premtuar se do të ketë lehtësira në ditët e para të funksionimit të aplikacionit për liridaljet, në të gjithë vendin janë ndëshkuar 2 mijë këmbësorë. Të detyruar për të shlyer detyrimet por dhe për të bërë blerjet ditore banorët theksojnë se portali e-Albania nuk ka funksionuar si duhet.
Rreth 2 mijë këmbësorë janë ndëshkuar nga policia e shtetit që prej nisjes së kufizimeve për daljen nga banesa.
Vetëm gjatë 24 orëve të fundit janë ndëshkuar me nga 10 mijë lekë 281 shtetas të cilit kishin dalë pa asnjë arsye apo emergjence, dhe kanë kundërshtuar urdhrin për të hyrë në banesë.
Përkundrejt masave të ashpra, qytetarët ankohen se nuk kanë mundur të sigurojnë një leje.
Sipas tyre iu është komunikuar nga drejtuesit e portalit e-Albania se nuk do të ketë ndëshkime për shkak të problemeve që janë hasur me portalin.
“Kishte probleme faqja, ishim të detyruar të dalim”.
“Sot nuk mora leje se kishte probleme sistemi. Ata na thanë se mund të lëvizim”.
Gjoba janë vendosur dhe ndaj personave që kanë shkelur rregullin e vetëkarantinimit.
Policia ka shpërndarë një material ku deklaron se një person është ndëshkuar me masë administrative 700 mijë lekë pasi ka hyrë në Shqipëri nga një vend i prekur nga COVID-19, dhe nuk është gjetur në ambientet e banesës së tij.
Edhe 7 njësi tregtare janë gjobitur me 100 mijë lekë për shkak të shkeljes së rregullave.
Sa u përket rregullave të lëvizjes janë bërë 357 mijë kërkesa për lejim qarkullimi me automjet, nga të cilat janë miratuar 30 mijë.
