Përmes një akti normativ qeveria shqiptare ka miratuar qëndrimin e përkohshëm në shtëpi të të dënuarve, si një leje e veçantë, gjatë kohëzgjatjes së epidemisë së shkaktuar nga COVID-19.
Ministrja e Drejtësisë, Etilda Gjonaj, informoi se nga akti normativ i qeverisë përfitojnë 600 të dënuar, të cilët do të qëndrojnë në shtëpi për tre muaj,në zbatim të planit të luftës kundër koronavirusit.
Gjonaj: Dje miratuam aktin normativ për lirimin me qëndrim të përkohshëm në shtëpi të të dënuarve me rrezikshmëri të ulët dhe që vuajnë nga një sëmundje që krijojnë terren nga virusi COVID 19.
Gazetarja e Ora News, Keti Banushi informon se në të gjitha burgjet të burgosuri janë njohur me këtë akt normativ dhe brenda 5 ditësh do të miratohet.
Të burgosurit mbi 60 vjeç dhe që janë dënuar me vendim të formës së prerë dhe u ka mbetur deri në 5 vjet dënim mund të qëndrojnë 3 muaj me leje të përkohshme në shtëpi.
Personat e dënuar nuk do të largohen nga shtëpia dhe as të dalin nga Shqipëria. Nuk përfitojnë personat që kanë kryer vepra të rënda penale.
Kriteret për përfitimin e lejes së veçantë:
1. I dënuari mund të përfitojë leje të veçantë qëndrimi të përkohshëm në shtëpi për një periudhë 3-mujore, në rast se në datën e hyrjes në fuqi të këtij akti normativ:
a) është i dënuar me vendim gjyqësor të formës së prerë dhe përmbush të dyja kushtet e mëposhtme: I ka mbetur pa vuajtur nga dënimi i dhënë deri në tre vjet burgim; Nuk është në kriteret ndaluese të parashikuara në nenin 5, të këtij akti normativ.
b) është i dënuar me vendim gjyqësor të formës së prerë dhe përmbush të gjitha kushtet e mëposhtme: I ka mbetur pa vuajtur nga dënimi i dhënë deri në pesë vjet burgim; Është baras ose mbi moshën 60 vjeç;
iii. Vuan nga një sëmundje kronike e rrezikshme për jetën, e vërtetuar me dokumentet mjekësore përkatëse, sipas përcaktimeve të legjislacionit në fuqi; Nuk është në kriteret ndaluese të parashikuara në nenin 5, të këtij akti normativ.
2. Periudha e qëndrimit të përkohshëm në shtëpi, sipas përcaktimeve të këtij neni, përfshihet në kohën e vuajtjes së dënimit.
3. Nëse gjatë periudhës së zbatimit të lejes së veçantë të qëndrimt të përkohshëm në shtëpi, gjykata vendos ekzekutimin e vendimit të dënimit me një dënim alternativ, sipas parashikimeve të Kodit Penal, leja e veçantë, sipas këtij akti normativ, shfuqizohet.
