Gruaja e moshuar 73-vjeçare, një nga 10 të infektuarit me koronavirus në Shqipëri, është në gjendje të rëndë shëndetësore, dhe nga spitali infektiv i Durrësit, mbrëmjen e djeshme është dërguar në reanimacion. Gruaja me inicialet Xh.G, e cila është e sëmurë kronike prej disa vitesh nën survejimin e mjekëve, mbrëmë ka pasur tension të lartë 140/70.
Mësohet se të gjithë mjekët, infermierët dhe personeli mjekësor që është kujdesuar për zonjën në fjalë, i është nënshtruar testit për koronavirusin, dhe tamponët janë dërguar në laboratorin e Institutit të Shëndetit Publik. Ndërkohë, 4 pjesëtarë të stafit mjekësor që kanë pasur kontakte më të ngushta me 73-vjeçaren, janë vendosur në vetëkarantinë.
Sakaq, në spitalin Infektiv të Tiranës në QSUT ndodhen babë e bir, dy të infektuarit e parë, 28 dhe 54 vjeç, dhe një 31 vjeçar që nuk kishte pasur kontakt me ta por që ishte kthyer pak ditë më parë nga Milano pas një vizite 1 ditore.
6 të tjerët janë familjarë të babë e bir të cilët ndodhen të vetëkarantinuar në shtëpi nën mbikëqyrjen mjekësore. Gjendja e tyre sipas mjekëve, paraqitet e stabilizuar.
