Një ditë pas arrestimit të bujshëm, Report Tv ka zbardhur dëshminë e botuesit dhe pronarit të UET Henri Çili, i cili u vu në pranga për shkak se dyshohet se ka ndërhyrë në sistemin e drejtësisë për të lehtësuar dënimin e formës së prerë nga Apeli për dy vëllezërit nga Lazarati Alban dhe Arbjon Aliko, për vrasjen e efektivit të RENEA-s Ibrahim Basha, në qershor 2015 në Lazarat.
Henri Çili ka mohuar të ketë pasur dijeni për gjithcka që akuzohet nga organi i Prokurorisë. Oficerët e Policisë Gjyqësore kanë ndeshur në refuzimin e dhënies se shpjegimeve nga ana e Çilit. Ky i fundit i është nënshtruar seancave pyetësore në orët e vona të mbasdites së djeshme tek oficerët e Policisë Gjyqësore.
Në të gjitha dëshmitë që ka dhënë në një orë e gjysmë seancë pyetësore në ambientet e Drejtorisë Vendore të Policisë së Gjirokastrës, Henri Çili mësohet të jetë shprehur se s’ka kryer asnjë shkelje për akuzat që i bëhen dhe se gjithcka sipas tij është tërësisht e manipuluar dhe do t’i kundërshtojë në momentin e duhur me prova dhe fakte.
Burime nga Prokuroria e Përmetit bëjnë të ditur se Henri Çilit do t’i komunikohet masa e arrestit në orët e mesditës së nesërme në Gjykatën e Faktit në Përmet. Mbi Çilin rëndojne akuza për katër vepra penale “Mashtrimi”, “Ushtrimi i ndikimit të paligjshëm tek gjyqtari”, dhe “Pastrim të produkteve të veprës penale”.
