Në fjalën e mbajtur në hapjen e konkursit për godinën e re të Bashkisë së Tiranës, Kryebashkiaku Veliaj ka rrëfyer edhe një episod.
Ai u shpreh se gjatë administratës së mëparshme, një prej rrugëve të kryeqytetit ka marrë emrin e një të dënuari përjetë, ku për ironi në këtë lagje jeton prokurori që ka kërkuar dënimin e tij. Veliaj theksoi se ky 100-vjetor duhet të jetë edhe një moment reflektimi për të vlerësuar njerëzit mbi bazë të meritave të tyre.
“Më shkruajti një ditë një prokuror, i cili tha: Më vjen turp kur më vjen posta në shtëpi sepse emri i rrugës mban emrin e një trafikanti që unë e kam dënuar me burgim të përjetshëm dhe vrasje. Qoka që i kishte bërë ish-administrata para nesh ishte që këtij të fortit i kishin vënë emër rruge.
Prokurori që e kishte çuar prapa kangjellave kishte adresën tek ajo rrugë, është të fyesh inteligjencën në mënyrë spektakolare. Nëse ka personalitete që do të duhet të vlerësojmë nga arkitektura, urbanistika, inxhinierë, që të mos presim të bjerë tërmeti i radhës dhe të kujtohemi që heronjtë i kemi mes nesh”, deklaroi Veliaj.
