Presidenti i Republikës Ilir Meta në këtë ditë të bekuar për katolikët dhe ortodoksët, me rastin e Krishtlindjeve, komentoi vendimin që mori për t’i dhënë nënshtetësinë shqiptare Kryepeshkopin Anastas Janullatos.
Në një prononcim për mediat, jashtë ambienteve të Kishës Ortodokse, Meta shpjegoi arsyet se pse erdhi tani ky vendim, ndërsa vlerësoi rolin dhe kontributin e Janullatos në vendin tonë.“Përgjigjen më të mirë e tha fortlumturia e tij. Është si puna e verës. Mendoj se është një moment shumë pozitiv i shprehjes së mirënjohjes për këtë vepër të madhe që ai krijoi me lidershipin e tij të jashtëzakonshëm për 25 vite, duke e ringritur nga hiri kishën autoqefale. Ajo që është me rëndësi, investimi i tij, edukimi i tij për të krijuar një plejadë të Kishës Ortodokse, që kanë arritur në këto nivele të larta. Dua të theksojë se lidershipi i tij në krye të kësaj kishe ka qenë mundësi e shkëlqyer jo vetëm për kishën ortodokse autoqefale, por edhe një mundësi për të promovuar Shqipërinë si një vend europian. I një vend i bashkëjetesës fetare. Lumturia e tij ka predikuar për gjithë shqiptare për paqe.”, tha Meta.
Pyetjes së gazetarëve nëse ky vendim lidhet me deklaratën e Janullatos se kisha do të ketë pasardhës shqiptar, Meta iu përgjigj se: “Mendoj se kjo lidhet me veprën e tij dhe ashtu sikurse ai u shpreh se ‘vera sa më e vjetër të jetë aq më shumë vlera ka’. Unë do thoja se sa më shumë vite do të kalojnë nga sot, aq më shumë do lartësohet figura dhe kryevepra e tij në modernizmin e kishës Ortodokse Autoqefale”.
Po ashtu kreu i shtetit uroi të gjithë besimtarët e krishterë për festën, për shpresë dhe solidaritet.
“Shpresë, dashuri, solidarit dhe paqje. Të gjithë të jemi sa më pranë familjeve tona dhe njëri-tjetrin. Të bashkëpunojmë për më shumë paqe e mbarësi dhe begati, për më shumë vëmendje dhe kujdes ndaj atyre që janë të pamundur, në mënyrë që të kemi shoqëri të bashkuar dhe në të ardhmen. Krishtlindja është pak më e veçantë. Jo vetëm se Kisha Ortodokse është dhe më shqiptare, por edhe evropiane, më gjithëpërfshirëse, edhe më e vendosur në ato vlera të solidaritet dhe mirëkuptimin që çojnë këtë shoqëri në me besim drejt evropianizimit të plotë. Kjo është një ditë e cila ka dhe shumë diell, dhe shumë shpresë”, tha Meta.
