Kanë kaluar një muaj nga koha kur Shqipëria përjetoi një ndër momentet më të vështira; atë të goditjes nga tërmeti me magnitudë 6.4 i shkallës Rihter. 51 qytetarë humbën jetën, qindra të tjerë mbetën të lënduar dhe një numër i konsiderueshëm familjesh mbetën të pastreha.
Por cila është sot situata në qarqet Durrës, Tiranë, dhe Lezhë në të cilën është shpallur gjendja e jashtëzakonshme?
Komitetit Ndërministror të Emergjencave Civile që drejtohet nga Ministri Bledi Çuçi bën të ditur se deri më sot 3777 persona në Durrës, Laç dhe 7 familje në Bashkinë Vorë janë akomoduar në hotele. Gjithashtu qytetarë të prekur nga tërmeti janë të vendosur në çadra dimërore si dhe në 15 njësi banimi të lëvizshme në Manzë.
Vijon puna në inspektimet e dëmeve në terren. Deri më tani grupi i inxhinerëve përbërë me ekspertë vendas dhe të huaj kanë inspektuar dhe vlerësuar 34,940 objekte nga të cilat 2950 objekte janë vlerësuar më dëmtime të rënda dhe të pabanueshme.
Inspektoriati i Mbrojtjes së territorit dhe forcat xhenio raportojnë se deri më sot janë shembur 68 objekte, 51 në qarkun Durrës, 10 në qarkun Tiranë, dhe 7 në qarkun Lezhë, të përcaktuara si me rrezikshmëri shumë të lartë.
Përsa i takon politikave sociale, bashkitë respektive kanë miratuar në mbledhjet urgjente bonusin e qirasë që u jep mundësi familjeve që të jetojnë në shtëpi ndërkohe që detyrimet mujore paguhen nga shteti. Një muaj pas kësaj tërmetit , Komitetit Ndërministror i Emergjencave Civile raporton për 4127 familje përfituese të bonusit të qirasë.
– Qarku Lezhë
Total 563 familje përfituese
Bashkia Kurbin 403
Bashkia Lezhë 160
– Qarku Durrës
Total 1310 familje përfituese
Bashkia Durrës 1310
– Qarku Tiranë
Total 2254 familje përfituese
Bashkia Tiranë 1794
Bashkia Vorë 460
