Kryeministri Edi Rama tha se Ilir Meta ka humbur busullën dhe e ka kthyer institucionin në një frëngji prej ku sulmon nga të katër anët.
Në këtë sulm Rama tha se Meta nuk ka kursyer madje as ndërkombëtarët e SHBA dhe BE, të cilët janë promotorët dhe mbështetësit më të mëdhenj të reformës në drejtësi prej fillimit të procesit.
“Një histori e zakonshme me Ilir Metën edhe një herë tjetër përplasja është jo mes nesh dhe Ilir Metës, por mes Ilir Metës dhe drejtësisë.
Dhe edhe një herë tjetër për këdo që do të kuptojë pa hyrë në të thella jemi përballë si Kuvendi i Shqipërisë me njeriun që e ka humbur busullën dhe e ka kthyer institucionin në një frëngji prej ku sulmon nga të katër anët.
Duke qenë ne këtu 100 % jo 99%, por 100 % në të njëjtën linjë me SHBA dhe BE dhe natyrisht pastaj është e lehtë të kuptohet pse si çdo herë tjetër Ilir Meta nuk kursen as partnerët strategjikë dhe as dy aleatët e mëdhenj të palëkundur të Shqipërisë, SHBA dhe BE, duke na vënë të gjithëve në një pozitë jo komode dhe të turpshme, sepse insinuon haptaz se këto përfaqësi të nderuara të shteteve që janë qysh në ditën e parë të procesit të reformës në drejtësi promotore dhe mbështetëse të kësaj reforme, akuzohen si të korruptuara.
Nuk ka më turp, dhe pas kësaj besoj se nuk ka as nevojë të zgjatemi e të stërgjatemi për të shpjeguar arsyet që na sjellin këtu dhe drejtësinë e vendimmarrjeve tona. Këtë herë nuk do merrem me Ilir Metën, por me drejtësinë”, tha Rama.
“Ky Kuvend duhet të marrë masa ligjore e kushtetuese, për të krijuar të gjithë mekanizmat zhblokues ndaj çdo akti flagrant dhe brutal bllokimi të atij që zyrën e presidentit e ka kthyer në një frëngji për të shantazhuar parlamentarët, ndërkomëbtarët e popullin shqiptar.
Besoj se komisioni i ngritur Ad Hoc për shkarkimin e Ilir Metës duhet ta konsiderojë seriozisht dhe në dritën e kësaj linje të re.
Të gjithë duhet të kontribuojnë për të ardhur dhe votuar këtu në Kuvend neutralizimin e akteve të presidentit e akteve antikushtetuese e antiligjore.
Është shumë e thjeshtë. Merreni me mend. Kemi bërë një Reformë Drejtësie për të hequr proceset e pazaret e politikës nga emërimet.
Kemi ngritur një institucion të pavarur, KED, që është instituciojn i vetëm që ka detyrimin dhe të drejtën të ndjekë procesin dhe të vendosë para presidentit listat e kandidaturave sipas radhës për të zgjedhur.
Nuk ka interpetime të mundshme në këtë proces.
Kush jemi ne që mund të interpetojmë e vendosim ndryshe nga sa kanë vendosur institucionet e në këtë rast KED.
Nuk ia vlen të humbasim më shumë kohë për të komentuar marrëzitë e Ilir Metës. Na ka rënë ky taksirat, i ka rënë ky taksirat shqiptarëtve e do vijojmë derisa zyra e presidentit do të jetë tokë e xanum nga dikush që ka humbur busullën”, vijoi Rama.
