Nxënësit në shkollat apo gjimnazet që do të ofrojnë ushqimin në mensat apo konviktet e tyre, gjatë këtij viti shkollor do të duhet të paguajnë një kuotë mujore prej 6,655 lekësh. Në Shkollën e Mjeshtërisë Sportive dhe Arsimin Special, kjo kuotë është më e lartë, 7217 lekë në muaj.
Për të zbutur efektet financiare të familjeve të nxënësve, Këshilli i Ministrave ka vendosur të ofrojë 2900 bursa e gjysmëbursa, ku pjesa më e madhe (2100) i takojnë nxënësve të vitit të parë që ndjekin shkollat profesionale. Po ashtu, bursat do të ofrohen edhe me vendim të këshilleve bashkiakë, të cilat caktojnë vetë fondin dhe numrin e bursave.
Kategoritë që përfitojnë nga këto bursa ndahen sipas kriterit ekonomik, rezultateve të arritura në vitin shkollor pararendës, si edhe nxënës me status të veçantë. Ndërsa nxënëset vajza do të shihet me prioritet gjatë procesit të përzgjedhjes së bursantëve.
9-vjeçaret dhe shkollat e mesme
Mund të përfitojnë bursë brenda kuotave, të gjithë nxënësit e arsimit parauniversitar që vazhdojnë studimet 5 kilometra larg nga vendbanimi i tyre, si edhe ata nxënës që banojnë në zonat rurale, të cilët nuk kanë një shkollë 9-vjeçare brenda rrezes prej 5 kilometrash.
Po ashtu përfitojnë edhe nxënësit që kanë statusin e jetimit; që kanë humbur kujdestarinë prindërore; që kanë statusin e invalidit; që nuk shikojnë apo dëgjojnë; fëmijët e personave me statusin e invalidit që nuk kanë të ardhura të tjera përveç pensionit të invaliditetit; nxënësit e komuniteteve rom dhe egjiptian që ndjekin arsimin e mesëm profesional; nxënësit e identifikuar si viktima të trafikut të qenieve njerëzore.
Vendimi parashikon që nga këto bursa mund të përfitojnë edhe fëmijët e punonjësve që kanë humbur jetën në krye të detyrës në institucione si Policia e Shtetit, Garda e Republikës, Shërbimi i kontrollit të Brendshëm, Policia e Mbrojtjes nga Zjarri dhe Shpëtimi, Forcat e Armatosura, Shërbimi Informativ Shtetëror dhe Policia e Burgjeve.
Arsimi profesional
Një përparësi të veçantë në marrjen e bursave i është dhënë nxënësve që ndjekin me kohë të plotë arsimin profesional. Kriteret për të përfituar në këto raste përfshijnë drejtimin mësimor dhe vendbanimin e përhershëm.
Drejtimet mësimore përfshijnë degët: bujqësi, veterinari, pyje, ndërtim, peshkim, detari, gjeologji-miniera dhe shpim e shfrytëzim i vendburimeve të naftës dhe gazit.
Vendbanimi i përhershëm duhet të jenë në një nga zonat verilindore dhe juglindore të vendit: Dibër, Bulqizë, Mat, Kukës, Has, Tropojë, Pukë, Mirditë, Malësi e Madhe, Librazhd, Gramsh, Kolonjë, Përmet, Skrapar dhe Tepelenë.
Por për kriteret e mësipërme ekzistojnë kushtet për humbjen e të drejtës së përfitimit, kur nxënësit janë ndarë nga trungu familjar, kur familjet e tyre ushtrojnë veprimtari private, apo kur shpallen ngelës dhe humbasin vitin shkollor për arsye të rezultateve jokaluese.
Kushtet për dhënien e bursës
Sipas tabelave të mëposhtme, kualifikimi ose jo për bursa dhe gjysmëbursa do të bëhet në bazë të kushteve ekonomike të nxënësit. Për shembull, një nxënës nga një familje me 4 persona mund të përfitojë një bursë të plotë vetëm nëse të ardhurat mujore të familjes janë nën 12 mijë lekë të reja. Nga kjo shumë, deri në 17600 lekë të reja, nxënësi kualifikohet vetëm për gjysmëbursë, ku shteti ndan bashkë me familjen shpenzimet për ushqimin e nxënësve.
KUSHTET EKONOMIKE TË NXËNËSIT PËR DHËNIEN E BURSËS
Në tabelën e mëposhtme, tregohet edhe shuma e financimit nga prindërit dhe shtetit, në varësi të bursës së përfituar dhe arsimit të ndjekur. Përjashtim bën rasti i nxënësve me statusin e jetimit, të cilët do të financohen tërësisht nga shteti në masën 7217 lekë në muaj.
MASA E BURSËS PËR NXËNËSIT
Në mbështetje të kategorive të veçanta, shteti ka akorduar edhe kuota financiare të veshmbathjes, të cilat mund të përfitohen nga fëmijët e arsimit special dhe nxënësit romë e egjiptianë në masën 7 mijë lekë në vit, si edhe nga jetimët në masën 10 mijë lekë në vit.
