Aktivistja që preku mbarë botën me fjalimin e saj për ndryshimet klimatike, Greta Thunberg, ka udhëtuar drejt Kalifornisë ku është takuar me Leonardo DiCaprion.
Aktori 44 vjeçar ka postuar disa fotografi së bashku me 16 vjeçaren nga Suedia.
Ai ka vlerësuar thirrjen e Gretës dhe shpreson që mesazhi i saj të zgjojë drejtuesit e botës për të ndryshuar diçka dhe se koha e mosveprimit ka mbaruar.
Në postim Leonardo shkruan:
Ka shumë pak raste në historinë e njerëzimit ku zërat janë të amplifikuar në momente kaq të rëndësishme dhe në mënyra të tilla transformuese por Greta Thunberg është bërë udhëheqëse e kohës tonë.
Historia do të na gjykojë për atë që ne bëjmë sot për t’i ndihmuar gjeneratat e ardhshme që të mund ta shijojnë të njëjtin planet të jetueshëm që ne e kemi marrë si të mirëqenë. Shpresoj që mesazhi i Gretës është një thirrje zgjimi për drejtuesit e botës që koha e mosveprimit ka mbaruar.”
Gjithashtu pak ditë më parë aktori Leonardo DiCaprio, ka reaguar kundër vendimit të Qeverisë shqiptare për të ndërtuar tetë hidrocentrale në Vjosë, që është edhe lumi i vetëm ‘i egër’ në Evropë. Në profilin e tij në Instagram, ku ndiqet nga 37 milionë njerëz, Di Caprio ka shpërndarë videon dhe tekstin e The Associated Press ku flitet për planet që i japin fund veçantisë së lumit shqiptar.
