Një aksident tragjik i ndodhur mbrëmjen e djeshme në vendin e quajtur “Rrethrrotullimi i Kolonjës” në aksin Fier-Lushnjë, u mori jetën dy të rinjve dhe la të plagosur rëndë një tjetër.
Automjeti ku po udhëtonin të rinjtë humbi kontrollin dhe përfundoi në kanal, për shkak të mjergullës dhe shpejtësisë së lartë.
Dy kushërinjtë, Orges dhe Alteo Shabani, 21 dhe 22-vjeç, ndërruan jetë nga ky aksident tragjik, ndërsa 24-vjeçari, Alban Doksani ndodhet në spital, në gjendje të rëndë.
Klajdi Ndreçka, i cili ishte dëshmitari i parë që pa me sytë e tij aksidentin e rëndë, tregoi se pati ceremoninë e dasmës së tij mbrëmjen e së dielës, dhe se është tmerruar nga ajo çfarë pa. Ai ndaloi makinën e tij dhe së bashku me një person tjetër bënë të mundur nxjerrjen e të rinjve jashtë makinës.
Ai shprehet se pamja tronditëse që pa, të heq dëshirën për të jetuar në Shqipëri.
Më tej ai shtoi se kanë pritur më shumë se 50 minuta gjer në mbërritjen e policisë dhe ambulancës, pavarësisht se kishin telefonuar disa herë në adresë të tyre.
Për “top chanel”, ai rrëfeu:
Më mirë të mos e kisha parë, ishte një tmerr. Të heq dëshirën për të jetuar në këtë vend. U martova të dielën dhe pasi pushova gjatë të hënës po udhëtoja në Fier për të bërë disa pagesa, por ajo që pashë ndikoi negativisht. Ishte e tmerrshme. Nuk do doja kurrë të shikoja një gjë të tillë. Telefonova disa herë Policinë, por nuk erdhën. Pasi i nxorëm trupat e të tre personave atëherë erdhi zjarrfikësja, ndërsa policia jo.”
Klajdi u shpreh më tej se ky vend nuk ka asnjë ndriçim. Ai theksoi se ka emigruar dhe nëse jashtë do kishte pika të tilla, i gjithë segmenti rrugor do të ishte mbyllur.
