Një nga anëtarët e celulës terroriste, tashmë të identifikuar nga Policia shqiptare, dyshohet të ketë pasur rolin e të infiltruarit dhe kishte ardhur disa herë në vendin tonë.
Bëhet fjalë për ish-anëtarin e MEK, Erwin Aram, 45 vjeç, i cili njihet edhe me pseudonimin “Alireza Naghashzadeh”. Drejtori i Përgjithshëm i Policisë, Ardi Veliu, gjatë konferencës së dy ditëve më parë tha se ky person jeton në Austri dhe është i pajisur me pasaportë austriake. Veliu tha se Erwin Aram u dërgua nga kreu i celulës, PEYMAN, për të grumbulluar informacion në Shqipëri gjatë disa vizitave të veçuara, si pjesë e planeve për një sulm që eventualisht u ndalua.
Burimet thanë se, si një ish-anëtar i opozitës iraniane, Aram ka të strehuar familjen e tij në kampin e Manzës, në Durrës, të cilët i ka vizituar në periudha të ndryshme. Ndërsa mësohet se ka hyrë disa herë në Shqipëri me pasaportë austriake, ku në hyrjen e fundit para dy muajsh Policia ka tentuar ta ndalojë, por në mungesë të provave ka arritur vetëm ta marrë në pyetje.
Si i infiltruar i celulës që drejtohej nga PEYMAN, ky person dyshohet se merrte informacionet e duhura në lidhje me veprimtarinë që bënin pjesëtarët e opozitës iraniane, të cilët janë dëbuar nga vendi i tyre dhe që janë strehuar në Shqipëri. Të njëjtat burime thanë se prej më shumë se 24 orësh, 4 anëtarët e celulës terroriste janë shpallur në kërkim policor dhe fotografitë e tyre janë shpërndarë në të gjitha pikat e kalimit kufitar.
CELULA
Celula terroriste drejtohet nga operativi i Forcave QUDS, i njohur si PEYMAN. PEYMAN është rezident i përhershëm në Iran dhe menaxhon në distancë një numër operativësh në Shqipëri dhe në vende të tjera në Europën Qendrore dhe Perëndimore. Mes të tjerash, ai inicioi dhe zbatoi tentativën e fundit për sulm në muajin mars 2018.
PEYMAN menaxhon shumë operativë, disa për grumbullim informacioni dhe të tjerë për të kryer sulme terroriste. Një nga këta operativë është Alireza Naghashzadeh, një iranian i cili është vetë një ish-anëtar i MEK-ut dhe zotëron një pasaportë austriake. Naghashzadeh u dërgua nga PEYMAN-i për të grumbulluar informacion në Shqipëri gjatë disa vizitave të veçuara, si pjesë e planeve për një sulm që eventualisht u ndalua.
Një tjetër operativ është Abdolkhalegh Malek Zadeh, një iranian që jeton në Turqi dhe që ka drejtuar celulën operacionale. Malek Zadeh(i njohur gjithashtu nga lidhjet kriminale me pseudonimin “Ferhat”) ka vazhduar të punojë gjatë dy viteve të fundit me Abdulselam Turgut, një figurë e njohur e krimit të organizuar turk, për të planifikuar sulme terroriste me urdhër të PEYMAN-it dhe të forcave QUDS. Turgut, i njohur si një bos mafioz turk dhe kreu i një rrjeti të fuqishëm ndërkombëtar të trafikut të drogës, është burgosur së fundmi në Azerbajxhan dhe në Turqi me akuza për trafik droge.
ANETARET E CELULES
1. “PEYMAN” i dyshuar si drejtues i celulës, rezident i përhershëm në Iran, nuk
jepen të dhëna të tjera.
2. ABDOLKHALEGH MALEK ZADEH i datëlindjes 21 prill 1979. Njihet si “Ferhat”, jeton në Turqi.
3. ERWIN ARAM i datëlindjes 13 korrik 1974. Njihet si “Alireza Naghashzadeh”, jeton
në Austri, ish-anëtar i MEK.
4. ABDULSELAM TURGUT i datëlindjes 27 maj 1967, i arrestuar së fundmi Azerbajxhan dhe në Turqi me akuza për trafik droge, ka qenë i arrestuar edhe në Shqipëri.