Autoriteti i Mediave Audiovizive ka reaguar pas akesave që ka marrë në tre ditët e fundit nga qytetarët në lidhje me mungesën e sinjalit të televizionit kombëtar “Klan” dhe “Klan Plus” në platformën satelitore “Digitalb” dhe në dy nga platformat IPTV që ritransmetojnë paketën televizive “Digitalb”.
Në këto kushte, Këshilli i Ankesave pranë AMA-s thekson se ka mbledhur të gjithë ankesat e mbërritura pranë institucionit dhe ka nisur procedimin së pari duke kërkuar informacion nga platforma “Digitalb” dhe Televizioni “Klan”.
AMA ka kërkuar ndërhyrjen e Ministrisë së Financave me qëllim garantimin e të drejtave të konsumatorëve dhe shmangien e praktikave të pandershme tregtare në fushën e shërbimeve mediatike audiovizive.
“Autoriteti i Mediave Audiovizive në mbështetje të interesit më të lartë publik, në zbatim të ligjit nr. 9902, datë 17.04.2008 “Për mbrojtjen e konsumatorëve” dhe referuar Marrëveshjes së Bashkëpunimit midis Ministrisë së Financave dhe Ekonomisë dhe Autoritetit të Mediave Audiovizive, nënshkruar në datën 13 qershor 2019, ka kërkuar ndërhyrjen e këtij institucionit me qëllim garantimin e të drejtave të konsumatorëve dhe shmangien e praktikave të pandershme tregtare në fushën e shërbimeve mediatike audiovizive” thuhet në njoftim.
AMA e mbyll reagimin duke garantuar se mbetet e angazhuar për adresimin e plotë të situatës së krijuar dhe bashkëpunimin e ngushtë me institucionet që sigurojnë konkurrencën në treg për shmangien e situatave të ngjashme në të ardhmen. Ndërprerja e bashkëpunimit midis dy kompanive erdhi për shkak të mosarritjes së një marrëveshje për rinovimin e kontratës.
