Gjykata e Tiranës ditën e djeshme ka hedhur poshtë kërkesëpadinë për mosnjohje të procesit zgjedhor nga ana e Mziut dhe ka konfirmuar mandatin e Rakip Sulit për bashkinë e Kamzës. Pas kësaj ka reaguar edhe kryetari në ikje i bashkisë së Kamzës, Xhelal Mziu duke thënë se nuk ka ndërmend që t’i lirojë zyrën Rakip Sulit pasi sipas tij zgjedhjet ‘reale’ do të kryhen në tetor në datën që ka dekretuar Meta.
Më anë të një statusi, ish-kreu i Bashkisë së Kmzës që njihet si një bastion i PD, i ka dalë kundër liderit të PD, Lulzim Basha. Ndryshe nga Basha dhe PD që deklarojnë se do të hyjnë në zgjedhje vetëm kur të largohet Rama, Mziu ashtu si LSI dhe aleatët e Bashës kërkon që të hyjë në zgjedhje në tetor.
Duke se një muaj pas zgjedhjeve lokale opozita ende nuk po gjen gjuhën e përbashkët.
“Drejtësia është vënë në tutelën e Rilindjes, është bërë palë me krimin që e mban në këmbë këtë pushtet dhe ka legjitimuar të paligjshme në procesin farsë të votimeve të 30 qershorit, duke na kthyer pas në diktaturë. Qytetarët e Kamzës nuk do të pranojnë që të drejtohen nga një i zgjedhur me 9 %. Bashkia dhe kryebashkiaku do të vazhdojnë punën deri kur në këtë vend të ketë zgjedhje legjitime, të dekretuara nga Presidenti i Republikës, të ketë garë, të jenë të lira dhe të ndershme, si dhe të pranohen nga faktori ndërkombëtar si arbitri i vetëm për standardet e plotësuara”, deklaroi Mziu ndër të tjera.
Kujtojmë se nëse Mziu bëhet pengesë për sulin që ky i fundit të marrë në dorëzim Bashkinë e Kamzës, Mziu rrezikon sipas ligjit deri në një vit burg.
