Duke folur nga Durrësi, kryeministri Edi Rama tha se ajo që po ndodh sot është seria e re, e një filmi të vjetër.
Kreu i PS u shpreh se gjithçka po bëhet kundër negociatave ndërsa solli në vëmendje zgjedhjet e dy viteve më parë.
Rama komentoi edhe marrëveshjen e 2017-ës. Ai u shpreh se edhe ndërkombëtarët u dorëzuan para Bashës.
“Pluralizmi është pjesëmarrja e shumë forcave dhe nuk mund të ketë zgjedhje me një kandidat.
Kur shqiptarët kanë vendosur të jetojnë në pluralizëm, kanë qenë në një mendje që partitë sjellin kandidatë para popullit.
Ata kanë një frikë më të madhe se fakti që nuk fitojnë. Kjo ka të bëjë me çeljen e negociatave për anëtarësim në Bashkimin Evropian. Kjo që kemi përjetuar këto muaj nuk është diçka e re.
Është thjesht një seri e re, e një filmi që kemi parë.
Dy vjet më parë kur në parlament do të votohej vetingu, bënë të njëjtën gjë. Ikën dhe poshtë zyrës timë ndërtuan një bunker plastmasi.
Vinte Luli në mëngjes, këndonte himnin, mbante fjalimin dhe pastaj ikte flinte në drekë.
Pasdite mbante fjalimin tjetër dhe aq ishte dita. Por çfarë thoshte në ato fjalime?
Ekzaktësisht atë që thotë sot: Nuk hyjmë në zgjedhje pa ikur qeveria dhe Rama. I vetmi që i ngeli në fund për negociata isha unë.
Ndërkombëtarët erdhën dhe u dorëzuan. Thanë, bëni çfarë të doni, hyni vetëm në zgjedhje, se me këtë nuk merremi dot vesh” – tha Rama sot në Durrës.