Ekrem Imamollu është kryebashkiaku i ri i Stambollit. Kandidati i opozitës republikane mposhti me një diferencë edhe më të thellë rivalin e partisë në pushtet për drejtësi dhe zhvillim Binali Jëlldërëm i konsideruar si krahu i djathtë i presidentit Erdogan.
Diferenca në zgjedhjet e ripërsëritura të kësaj të diele është rreth 9% në favor të Imamollusë, ndwrsa nw zgjedhjet e kontestuar të 31 Marsit kandidati i opozitws fitoi me 0.2 përqind. Ish-kryeministri i Turqisë Jëlldërëm doli në një konferencë për shtyp për të pranuar humbjen, ende pa u shpallur zyrtarisht rezultati.
Binali Yildirim, kandidat për bashkinë e Stambollit: Kundërshtari im Ekrem Imamollu ka marrë kryesimin. E përgëzoj dhe i uroj sukses.
Humbja e Stambollit është një goditje tepër e fortë për presidentin Rexhep Taip Erdogan. Ai humbi qytetin më të populluar të vendit që ai dhe kandidatët e partisë së tij e qeverisën pa ndërprerje prej çerek shekulli. Partia e Erdogan dështoi edhe në përpjekjen për t’a shpallur opozitën si manipuluese të votave. Me këto akuza u kontestua rezultati i zgjedhjeve lokale 31 Marsit në këtë qytet, akuza të cilat këto zgjedhje i hodhën poshtë. Republikanët dominojnë tashmë qytetet më të mëdha të vendit, përfshirë Ankaranë, pavarësisht partia e Erdoganit është forcë e parë politike me një mbështetje në rënie.
