Gjykata e Catanias në Itali ka dënuar me 15 vite e pesë muaj burg Mosi Habilaj, i shpallur fajtorë për trafik droge mes Shqipërisë e Italisë.
Ai u dënua tre vite më pak se sa kërkohej nga Prokuroria. Sipas mediave italiane, i veshur me një palë xhinse dhe një këmishë, Habilaj ka pritur në heshtje dënimin, brenda qelisë në gjykatë.
Ai është cilësuar si kreu i grupit të Habilajve që trafikonte marijuanë nga brigjet e Vlorës drejt shtetit italian.
Avokatët e tij mbrojtës, Giuseppe Ragazzo dhe Maria Caltabiano, thanë në seancë gjyqësore se Moisi Habilaj ka pasur rol të thjeshtë në këtë organizatë kriminale, atë të transportuesit. Dhe për këtë arsye, ata kërkonin që mbi Habilajn mos të rëndonte edhe akuza e kreut të grupit.
