Me votimin që Kuvendi i Shqipërisë bëri duke zgjedhur Arta Markun prokurore të re të përgjithshme, në një post të përkohshëm, Parlamenti mori fund.
Duke bërë këtë konstatim, kryetarja e Lëvizjes Socialiste për Integrim Monika Kryemadhi, tha se tashmë vendi i opozitës është në rrugë. Duke nënkuptuar kështu vijimin e protestave, Kryemadhi u pyet nga gazetarët edhe për një deklaratë të fortë që bëri më herët ish-kryeministri Sali Berisha për djegie të mandateve. Ajo tha se LSI-ja do të bëjë çfarë të vendosë populli.
“Ne do t’i drejtohemi popullit dhe do të bëjmë çfarë të thotë ai. Nuk është çështje e djegies së mandatave, mandatet tona janë mandate gjaku. Duhet t’i djegin ata që i kanë mandate me paratë e drogës”, tha kryetarja e LSI
Kryemadhi doli para mediave e shoqëruar nga deputetja e LSI-së Floida Kërpaci e cila mbeti e lënduar nga policia teksa hyri mes turmës për të ndihmuar një grua protestuese që shfaqi probleme shëndetësore. Mijëra qytetarë u ngritën në tubimin e organizuar nga opozita e bashkuar, ku para parlamentit kundërshtuan këtë proces, patën edhe përplasje me policinë.
“Sot kuvendi zgjodhi një grua prokurore me gjakun e deputetes një vajzë të re. Rama siç dhunon gratë e veta do tentojë të dhunojë edhe gratë e shqipërisë, por gratë shqiptare nuk do ta lejojnë një kryeministër kriminel. Kjo është prokuroria jonë. Ky parlament ka marrë fund. Këtu është luftë mes të mirës dhe të keqes. Populli është e mira, Rama me narkoparlamentarët dhe narkoprokurorët është e keqja. Ky institucion (Kuvendi) është i shembur dhe i kalbur”, – tha Kryemadhi.
