Debati për zgjedhjet lokale nëse do të mbahen apo jo më 30 qershor përfundoi në Kolegjin Zgjedhor, i cili do ta shqyrtojë në datë 24 Qershor pas apelit që i bëri Idajet Beqiri për të çregjistruar partinë e tij Uniteti Kombëtar.
Në datë 24 Qershor do të shqyrtohet në Kolegjin Zgjedhor kërkesa e Idajet Beqirit për të çregjistruar partinë e tij Uniteti Kombëtar. Beqiri ka kërkuar të çregjistrohet pas anulimit të zgjedhjeve nga presidenti Meta. Ankimimi i Beqirit i hap rrugë shqyrtimit në Kolegjin Zgjedhor të dekretit të Metës.
Idajet Beqiri argumentoi në kërkesën dërguar KQZ-së, se zgjedhjet janë anuluar me dekret të presidentit, i cili është botuar në Fletoren zyrtare dhe ka hyrë në fuqi.
Nga një analizë që partia e tij i bëri dekretit, ai tha se është antikushtetues, por është i detyruar të ndjekë vullnetin e forumeve të larta të partisë që duan të çregjistrohen nga zgjedhjet e 30 qershorit. Por kërkesa u rrëzua nga KQZ-ja, ndërsa Beqiri e dërgoi në Kolegjin Zgjedhor.
