Ekspozita “Ngjyrat e paqes” është çelur në Muzeun Historik Kombëtar. Fëmijë nga 114 vende të ndryshme prezantojnë në pikturë perceptimin e tyre për paqen. Ekspozita do të udhëtojë në vende të tjera të botës.
Si e shikojnë fëmijët paqen? Çfarë ngjyrash ka ajo? Fëmijë nga 114 vende të botës, të moshës 5-16 vjeç prezantojnë në ekspozitën “Ngjyrat e paqes” rreth 300 piktura. Diell, lule shumëngjyrshe, pëllumba edhe shtëpitë plotë dritë, janë disa nga simbolet më të shpeshta që shikojmë në këtë ekspozitë, që është çelur në Muzeun Historik Kombëtar. Disa nga piktorët e vegjël shqiptarë na rrëfejnë, se cili është koncepti i tyre për paqen.
“Paqja për ne është shumë e rëndësishme. Përherë duhet që të kemi paqe me njëri-tjetrin”.
Artisti i njohur Skënder Kamberi, i cili ka përzgjedhur punët e këtyre piktorëve të vegjël në mbarë vendin thotë se: “Aty është ndjenja e fëmijëve të Shqipërisë edhe të botës, të gjithë fëmijët sjellin zemrën e tyre, tokën edhe kontinentet, pëllumbin e paqes, diellin dhe dëshirën e së nesërmes është aty”.
Ndërsa, presidenti i “Ngjyrave të Paqes” edhe organizatori i kësaj nisme në Shqipëri shpjegojnë qëllimin e këtij projekti.
“Ky projekt ka nisur në vitin 2015, deri më sot jemi 114 shtete. Kjo nuk është vetëm pjesë e ekspozitës në Shqipëri, por edhe inaugurimit të degës sonë edhe në Tiranë. Projekti ka lindur në parkun Sant’Anna në Itali, Parku i Paqes, ku kanë humbur jetën 560 fëmijë edhe gra gjatë Luftës së Dytë Botërore. Këtu ka lind edhe ideja për të mbështetet projektin “Ngjyrat e paqes”. Për çdo vit bëhen ekspozita të ndryshme, që këtë vit po zhvillohet edhe në Shqipëri”, shprehet Antonio Giannelli, president i “Ngjyrat e Paqes”
Organizator i ekspozitës Thanas Gega tregon se të gjithë fëmijët e shikojnë paqen njësoj.
“Mendoj se është diçka e bukur, sepse fëmijët janë të të njëjtit mendim, se si duhet që të jeta paqja. Është për t’u habitur se të gjithë fëmijët, si ata që vijnë nga Siria, shqiptarët apo argjentinasit, të gjithë për këtë janë në një mendje. Kjo sensibilizon këdo, sepse vit për vit zhvillohet në vende të ndryshme”, shprehet organizatori i ekspozitës, Thanas Gega.
Ekspozita qëndron e hapur deri në datë 20 qershor në sallën e ekspozitave në Muzeun Historik Kombëtar.
