Me ardhjen e sezonit të verës dhe rritjes së temperaturave, nisin edhe problemet me djegien e lëkurës por edhe sëmundjet dermatologjike. Në një prononcim për Report Televizion, dermatologia Adriana Sinani thotë që grupmoshat më të prekura nga rrezet e diellit por edhe sëmundjet e lëkurës janë fëmijët dhe të moshuarit
Me ardhjen e sezonit të verës dhe rritjes së temperaturave, nisin edhe problemet me djegien e lëkurës por edhe sëmundjet dermatologjike. Në një prononcim për Report Televizion, dermatologia Adriana Sinani thotë që grupmoshat më të prekura nga rrezet e diellit por edhe sëmundjet e lëkurës janë fëmijët dhe të moshuarit.
“Një nga sëmundjet më të shpeshta është hiperhidroza, djersitja e shtuar e duarve e këmbëve, në periudhën e verës. Personat që vuajnë nga hiperhidroza e kanë këtë problematikë jashtëzakonisht të vështirë për ta mirëmbajtur dhe për ta ulur sasinë e djersëve; Janë mykozat, që në këtë periudhë kanë një shtim më të madh, për shkak të djersitjes, për shkak të mbajtjes së këpucëve për orë të gjata. Prandaj, ne rekomandojmë që në këtë periudhë veshjet të jenë të lehta. Rrezatimi diellor është një nga shkaktarët e kancerit të lëkurës, dua të theksoj diçka këtu për melanomën, u bëj thirrje njerëzve që të bëjnë kontrollet e nishaneve rutinë çdo vit. Sidomos para sezonit të verës”-tha Sinani.
Dermatologia jep edhe këshilla se si të shmangim rrezet e tepërta të diellit, duke përdorur kremra të ndryshëm, por edhe duke shmangur daljet në orët e ndryshme të ditës. “Ne si demratologë nuk e rekomandojmë ekspozimin në diell pas orës 10:00 ose 11:00 të paradites dhe para orës 17:00 të pasdites pasi rrezet e diellit janë shumë të forta dhe do të shkaktojnë djegie në fytyrë”shtoi mjekja. Mjekja këshillon gjithashtu që në këtë stinë kujdes të veçantë ti kushtohet pickimit nga insektet e ndryshme, por edhe kontrollet periodike për nishanet të cilat ekspozohen në diell.
