Kryeministri i Kosovës Ramush Haradinaj ka dhënë detaje për operacionin që është zhvilluar që në orët e para të mëngjesit në veri të vendit.
Kreu i qeverisë bën me dije se ky operacion është zhvilluar ndaj individëve të përfshirë në kontrabandë, krim të organizuar dhe vepra të tjera kriminale.
Sipas Haradinaj mes të përfshirëve janë zyrtarë doganorë, policë por edhe qytetarë. Po ashtu ai u ka bërë thirrje qytetarëve serbë të veriut të ruajnë qetësinë.
Reagimi i plotë:
Me urdhër të Prokurorit, në gjithë Kosovën aktualisht është duke ndodhur një operacion policorë, i drejtuar ndaj individëve të përfshirë në kontrabandë, krim të organizuar dhe vepra të tjera kriminale.
Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë.
Operacioni u zhvillua me sukses edhe në Komunat Veriore të Kosovës.
Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër.
Ftoj serbët e veriut ta ruajnë qetësinë dhe ta respektojnë ligjin!
