Depresioni që prek nënat e reja apo siç quhet ndryshe postpartum, është një temë për të cilën nuk flitet shpesh. Report Tv ka pyetur psikiatren Arjana Reli, e cila ka dhënë detaje mjaft interesante në lidhje me këtë problem. Sipas Rrelit, 80% të femrave përjetojnë një gjendje të lehtë depresive pasi kanë sjellë në jetë një fëmijë, ndërsa 10-20% e tyre mund të përjetojnë edhe depresion të rëndë që zgjat në kohë.
Lindja e fëmijës shkakton ndjesi të fuqishme tek nëna. Që prej gëzimit të papërshkrueshëm, deri tek frika apo ankthi. Por gjithashtu mund të sjellë edhe diçka të papritur, depresionin. Quhet “postpartum”, dhe prek më së shumti nënat e reja. Për këtë sindromë, psikiatrja Arjana Rreli, thotë për Report Tv, se më të rrezikuara janë ato gra të cilat janë përballur me një traumë në jetën e tyre, ndërsa 80% e grave e kalojnë pa rrezik këtë gjendje të shkaktuar nga hormonet.
“Sindroma “Baby blues” kalon brenda disa javëve, dhe prek 80% të femrave. Ndërkohë depresioni “postpartum” prek 10-20% nga nënat e reja. Nëse ky çrregullim humori zgjat në kohë, do të thotë që lindja ka qenë thjesht një shkak që ka çuar drejtë një sëmundjeje apo një problemi të shëndetit mendor. Çrregullimi “postpartum” vendoset më tepër në subjektet të cilët kanë pasur paraprakisht trauma apo konflikte psikologjike të mbartura nga koha”, shprehet Arjana Reli.
Por nuk janë vetëm gratë ato të cilat përballen me depresionin pas lindjes. Në disa raste janë meshkujt ata të cilët përjetojnë depresion pasi janë bërë baballarë. Psikiatrja Reli tregon se kjo sindromë prek më së shumti meshkujt e ndjeshëm.
“Ndodh edhe tek meshkujt, por jo për shkak të ndryshimeve hormonale, të cilat i ka femra në rastin e “postpartumit”. Tek meshkujt ndodh kur babai ka një personalitet të veçantë, që merr shumë përgjegjësi, është tipi shumë detajist dhe perfeksionist, kërkon të marrë të gjitha situatat nën kontroll pas lindjes së këtij fëmije”, thotw psikiatrja.
Depresioni Postpartum nuk është një mangësi e karakterit ose një dobësi. Ndonjëherë është thjesht një ndërlikim i lindjes. Të gjithë nënat e reja të cilat përjetojnë simptoma si ankth, mërzitje pa shkak, apo deri në raste ekstreme ku nuk duan të afrohen me fëmijën e tyre, bëjnë mirë t’i drejtohen një specialisti.
