Kryeministri Edi Rama, megjithëse e konsideron të pazakontë situatën aktuale politike, thekson se ajo mund të krijojë një situatë të re politike në vend.“Është një moment i pazakontë por ka gjithë potencialin e vet për të krijuar një situatë të re politike”, theksoi ai.
I pyetur nëse zgjedhjet mund të bëhen pa opozitën më 30 qershor, Rama, tha se me rëndësi janë standardet e tyre dhe jo numri i partive.
“Në një palë zgjedhje të gjithë duhet të kenë të drejtën të zgjedhin dhe po ashtu kanë të drejtën të mos zgjedhin, të rrinë në shtëpi. Unë jam lutur për opozitën dhe kreun e saj.
Mbi bazën e atij besimi vazhdon funksionimi normal i sistemit demokratik. Ata që nuk marrin pjesë në zgjedhje, ua lënë të tjerëve. Në një demokraci zgjedhjet i bëjnë standardet, që janë të garantuara dhe sigurisht të përmirësueshme”, theksoi ai.
