Në kuadër të samitit të Brdo-Brijuni, Presidenti i Kosovës Hashim Thaçi është takuar në Tiranë me kryeministrin Shqipërisë Edi Rama ku kanë diskutuar një sërë çështjesh delikate të faktorit shqiptar dhe rajonit.
Përmes një statusi një facebook presidenti Thaçi ka zbuluar detaje të bisedës me Kryeminitrin Rama, mes të cilëve është folur edhe për korrigjimin e kufijve.
Duke e cilësuar një padrejtësi historike, Thaçi thotë se ka diskutuar me Ramën bashkimin e faktorit shqiptar rreth sensibilizimit të së drejtës të bashkëngjitjes së Preshevës, Medvegjës dhe Bujanocit me territorin e Republikës së Kosovës.Palët kanë folur edhe për domosdoshmërinë e hapjes së plotë të kufirit Kosovë-Shqipëri dhe krijimin e një hapësire shqiptare pa kufi, nën ombrellën euroatlantike.
“Sapo zhvillova një takim me kryeministrin e Republikës së Shqipërisë, Edi Rama, ku mes tjerash biseduam për domosdoshmërinë e hapjes së plotë të kufirit Kosovë-Shqipëri dhe krijimin e një hapësire shqiptare pa kufi, nën ombrellën euroatlantike. Në këtë takim ngritëm nevojën e korrigjimit të padrejtësive historike, duke bashkuar faktorin shqiptar rreth sensibilizimit të së drejtës të bashkëngjitjes së Preshevës, Medvegjës dhe Bujanocit me territorin e Republikës së Kosovës”, shkruan Thaçi.
Presidenti Kosovës ndodhet në kryeqytetin shqiptar në kuadër të Samitit të Brdo-Brijunit i cili do të zhvillohet me datë 8 dhe 9 Maj. Ndërkohë një javë më parë u mbajt në Berlin Samiti për Ballkanin Perëndimor, i cili pavarësisht përpjekjes së Kancelares gjermane Merkel dhe Presidentit francez Macron, dështoi të ulë në tryezën e dialogut Prishtinën dhe Beogradin.
