Kryeministri i Kosovës, Ramush Haradinaj, ka tëhequr vëmendjen e medieve, pas mbledhjes së qeverisë, pasi është pyetur nga gazetarët se përse nuk është bërë këngëtar, pasi pasioni i tij për muzikën tashmë dihet.
Haradinaj u tha gazetarëve se i ka mbetur merak që s’është bërë këngëtar, si dhe çfarë kujtime ka ai nga lufta për të kënduarit.
“Për ata që kanë qejf me ditë pse këndoj, kangën e kam filluar në luftë, nuk e di prej tutës apo prej trimërisë. Para luftës nuk kam kënduar kurrë”, u shpreh Haradinaj.
Kryeministri Haradinaj ka treguar se çfarë kujtime ka nga lufta me këngën dhe të kënduarit.
“Në luftë nuk kemi pasë trumpetë ose alarm për t’i zgjuar ushtarët nga gjumi – ka qenë kënga: ‘Kah po shkon moj zanë. Krejt ushtarët e kanë pasë mërzi këtë këngë. Kur kam hyrë në vendet ku kanë flejtë ushtarët, të cilat kanë qenë shumë të tmerrshme t’i shohësh, nuk kam thënë ‘çohuni’, por kam kënduar ‘Kah po shkon moj zanë. Këndoj jo që di të këndoj ose që jam këngëtar – këndoj sepse kam qejf. Nëse ka komente dhe nuk i pëlqen dikujt – e kuptoj, por besoni se hera e parë që kam kënduar ka qenë veç në luftë kur kam shkuar t’i zgjoj ushtarët e UÇK-së. Nëse i pyesni ushtarët e UÇK-së nuk kanë pasë këngë më mërzi se ‘Kah po shkon moj zanë’. Kjo këngë ka zë shumë të madh dhe kur futesha duke kënduar ata ktheheshin ose në krahë tjetër për ta vazhduar gjumin, ose më shanin”, ka thënë kryeministri Haradinaj.
