Ministri i Bujqësisë dhe Zhvillimit Rural, Bledi Çuçi, ka folur në emisionin ‘Top Talk’ lidhur me raportimet e fundit në media për sigurinë ushqimore. Ai tha se nuk ka vend për alarm dhe se prodhimet shqiptare janë të sigurta. Për rastet kur konstatohet abuzim gjatë inspektimeve apo rastet e denoncuara në media ose nga qytetarët merren masat përkatëse sic e parashikon ligji.
Ministri tha se sot therja e mishit në thertore është disiplinuar dhe se në thertoret e licencuara nuk theret mish i pamatrikulluar.
“Në thertoret e licencuar nuk hynë asgjë, asnjë mish i pamatrikluluar. Kemi mbyllur 80% të thertoreve. Kemi disiplinuar tregun. Nuk hyn asnjë mish i pamatrikulluar se i mbyllet aktiviteti”, u shpreh i sigurt ai.
Ministri Çuçi foli për mishin e ardhur nga Brazili, duke siguruar që ai kontrollohet 100% ndryshe nga vendet e tjera të Europës. Sasia që kapet me probleme rikthehet në vendin e origjinës.
“Shqipëria është i vetmi vend në Evropë që e kontrollon mishin nga Brazili në masën e 100%. Po të them, i vetmi. Në 2017, ndodhi problemi dhe Evropa vendosi karantinë 100% dhe tani e ka liberalizuar tregun e mishit nga Brazili. Ne jemi i vetmi vend që i gjithë mishi që vjen nga Brazili, kontrollohet këtu . Kemi kthyer nga Brazili vetëm në muajt e parë të këtij viti 180 ton mish, si të papranueshëm. Dhe ka hyrë me ton nuk e di, por nja 300 ngarkesa, nga këto 15 ngarkesa janë kthyer. Kontrollohet çdo ngarkesë”, tha ministri Çuçi.
Sa i përket perimeve dhe pretendimit të ngritur në media për pjekjen e domateve përmes së ashtuquajturave hormone, ministri tha se fitorregullatorët që rëndom quhen hormone, megjithëse janë të lejuara për t’u përdorur, për fatin e mirë në Shqipëri janë zëvendësuar nga bletët që kryejnë procesin e polenizimit. Vetëm për këtë sezon të vitit 2019 janë importuar rreth 7 mijë kosherë të cilat mbulojnë 80% të sipërfaqeve të serave të mbjella me domate, tha Ministri i Bujqësisë dhe Zhvillimit Rural.
