Presidenti i Serbisë, Aleksandar Vuçiç thotë se është shumë i shqetësuar për gjithçka që po ndodh aktualisht si dhe për shkak të takimit të ardhshëm në Berlin.
“Unë jam i shqetësuar për gjithçka dhe për shkak të takimit në Berlin. Jo se kam frikë nga ndonjë presion, as nuk mendoj se do të ketë. Por nuk po shoh se si dhe çfarë më tej me njerëzit, që janë aq të papërgjegjshëm, siç janë udhëheqësit shqiptarë sot. Kjo është ajo që shkakton shqetësim të madh dhe një frikë të caktuar te unë, por kjo do të na shtyjë të sillemi në mënyrë më serioze dhe më të përgjegjshme”, tha sot Vuçiç pas vizitës në Qendrën klinike të Serbisë.
Siç raportojnë mediat serbe, Vuçiç ka thënë se ka parë se sa shumë vëmendje dhe pritje i kishin dhënë mediat shqiptare asaj që ndodhi të shtunën në rrugët e Beogradit [protesta e opozitës kundër presidentit serb] dhe se “mediat e Thaçit dhe Haradinajt i janë gëzuar asaj që potencialisht pritet t’i ndodhë atij”.
“Kjo më dha forcë shtesë dhe shpresën se po bëjë gjëra të mira për vendin tonë dhe njerëzit tanë në Kosovë”, tha presidenti.
Ai shtoi se mediat shqiptare, ndryshe nga ato gjermane dhe zvicerane, si dhe kroate, i panë gjërat nëpër rrugë në një mënyrë tjetër.
Dy shtetet më të fuqishme të Bashkimit Evropian, Gjermania dhe Franca kanë vendosur të mbledhin në Berlin më 29 prill udhëheqësit e Ballkanit Perëndimor, përfshirë këtu edhe presidentin e Kosovës, Hashim Thaçi dhe atë serb, Aleksandar Vuçiç.
Samiti do ta ketë theksin tek bashkëpunimi rajonal, por një nga qëllimet kryesor të këtij takimi duket se do të jetë fillimi i dialogut mes Kosovës dhe Serbisë.
