Deputetja demokrate Rudina Hajdari ka kritikuar ashpër Lulzim Bashën, duke folur si një lidere alternative e së djathtës. Sipas Hajdarit, vendimi për djegien e mandateve është marrë në mënyrë autoritare pa u konsultuar me bazën e partisë. Ajo tha në ‘Open’ se do të kërkojë së shpejti transparencë për partitë politike që nga financimi deri tek zgjedhja e kandidatëve. Hajdari kërkoi largimin e Lulzim Bashës kur tha se “nëse nuk qeveris dot shtëpinë tënde nuk mund të qeverisësh vendin”.
Por a janë amerikanët pas Rudina Hajdarit? “Sigurisht që unë këshillohem me miq të huaj, kam punuar në Kongresin amerikan, por nuk besoj dhe nuk mendoj se jam e privilegjuar prej tyre. Unë jam pjesë e komisionit të Jashtëm, atij të Integrimit, dhe interesohem nga afër për procesin e integrimit të Shqipërisë. Ne duhet të shohim një lloj mekanizmi që t’i provojmë liderët tanë në opinionin publik” tha Hajdari.
Një tjetër dilemë e ngritur nga publiku, është a po përgatitet Rudina Hajdari të formojë një parti të re? “Nuk besoj se është momenti për këtë gjë. Unë besoj se është koha e duhur për të bërë disa reforma të rëndësishme, si ajo e Kodit Zgjedhor, që do të sjellë shumë ndryshime, e ndoshta edhe ndryshim të sistemit politik. Ajo që dua unë të shoh është të kemi një tryezë që përfshin të gjithë faktorët politik, që të flasë për një reformë të thellë qoftë për partitë politike, ashtu dhe për Kodin Zgjedhor”, tha më tej Hajdari.
Ajo është pyetur edhe për vendimin që ka marrë vëllai i saj Kiri Hajdari që është parë në krah të kreut të PD-së, Lulzim Basha. “Si janë raportet në familjen time? Patjetër që flas me vëllain tim. Të gjithë kemi familjet tona. Ne jemi rritur në këtë mënyrë që të kemi mendimet tona të lira. Ne kemi kundërshtitë tona, por ne vendosim vetë. E vetmja gjë që i kam këshilluar Kirit është që të mos jetë pjesë e dhunës.
Patjetër që ia do të jetë në krah të demokratëve dhe unë jam në krah të demokratëve. Nuk i shoh komentet dhe këto momente ndoshta janë emocionale. Unë thjesht mendoj që kam një qëndrim të qartë në atë që bëj. Unë jam në krah të vëllait tim edhe pse ai ka mendimin e tij.
Ndihem shumë krenare për vëllain tim dhe që del dhe u thotë demokratëve në protestë që amanati i tim eti është me ju. Opozita del aty për disa qëndrime të drejta. Jam dakord me ato akuza që bën opozita. Unë kam qenë kundër djegies së mandateve sepse e kam parë si një vendim që braktis përgjegjësitë që ka opozita. Patjetër që opozita është një mekanizëm, por mund t’i kishim kombinuar të dyja” tha ajo.
