Pakti për Universitetin është një proces dialogu në vazhdim që do të sjellë cilësi në botën universitare.
Kështu deklaroi nga studio e ERTV, Ministrja e Arsimit, Besa Shahini, e cila shtoi se drafti i shkruar i paktit, u është nisur edhe universiteteve që duhet të japin mbrapsht angazhimin e tyre konkret, për plotësimin e kërkesave studentore.
Ndërsa u ndal te përgjegjësia që kanë universitetet për të kryer vlerësimin e titujve akademikë, për të cilën universiteti i Tiranës nuk ka marrë asnjë angazhim, Shahini njoftoi se ajo vetë do të thërrasë në një tryezë të përbashkët drejtuesit e tij, për të marrë propozimet e tyre.
“Vlerësimi i titujve akademikë apo plagjiaturat janë çështje të brendshme të universitetit që duhet t’i adresoje vetë bota akademike. Ne jemi ofruar që ta lehtësojmë këtë proces. Ministria ka edhe tagerin që të shohë pjesën e ligjshmërisë së marrjes së titullit akadmik, por kemi marrë shumë inpute nga pedagoge që kanë kërkuar të jenë pjesë e këtij procesi, që të bëhet bashkarisht. Jemi në pritje të propozimeve nga universitet si do ta menaxhojmë këtë proces. Kemi universitete si ai i Korçës që kanë bërë një hap përpara dhe kanë sjellë propozimet e tyre, por kemi edhe Universitetin e Tiranës që ka qënë i heshtur në këtë proces. Në fund të kësaj jave unë do të takoj rektorët në mënyrë që ta pershpejtojmë këtë proces. Unë kam pritur prej tyre propozimet e tyre, por veç Korçës nuk sollën të tjerë propozime, ndaj do ta inicioj unë një takim”, tha Shahini.
Ministrja e Arsimit shtoi se publikimi i të gjitha vendimeve që universitetet marrin, në platformën online u-transparenca është domosdoshmëri, në mënyrë që studentët të kenë akses në vendimarrjen e brendshme.
“Në portal ka edhe një seksion me emrin ankesa ime, ku studentët mund të klikojnë dhe nisin ankesën e tyre. Ne kemi një strukturë të ngritur që trajton të gjitha këto ankesa dhe probleme, të cilat ne i trajtojmë ose referojmë te universitetet”, tha Shahini.
