Kreu i grupit parlamentar të PS-së Taulant Balla e ka mbështetur Ministrin e Jashtëm në detyrë, Gent Cakaj, në lidhje me vendimin për shkarkimin e 20 personave në shërbimin diplomatik.
I pranishëm në Komisionin e Integrimit, ku u zhvillua edhe një debat mes ministrit Cakaj dhe deputetes së PD-së, Rudina Hajdari, në lidhje me këtë çështje, Balla inkurajoi ministrin, ndërsa shtoi se, sipas tij 20 janë pak.
Ai kërkoi më tej që Ministria të sillte sa më shumë informacion në pritje të marrjes së vendimit për çeljen e negociatave.
“Duhet ta keni në praktikën tuaj se ky është komisioni që do keni punën shumë intensive në javët në vijim por jo vetëm kur ju kërkon komisioni por në frymën e ligjit duhet të jeni edhe ju i gatshëm t’i drejtoheni komisionit për konsultime. Ky është një proces që nuk mund ta kryejë vetëm qeveria por në bashkëveprim me Kuvendin e Shqipërisë.
Ky komision është një komision që drejtohet nga opozita, do vazhdojë të drejtohet nga opozita. Sa më shumë hapësirë për opozitën në këto procese konsultimi, aq më e mirë është edhe vendimmarrja. Ju lutem në mënyrë të vazhdueshme edhe me shkresa dhe informacion të mbahet i informuar komisioni. Ju lutem mos u komplesoni nga kritikat dhe sulmet që vijnë nga opozita, në formën më pozitive nga zonja Hajdari dhe më negative nga ish-deputetë për ndryshimet në trupën diplomatike. Mua më duken pak 20. Jemi larg shërbimit konsullor i cili t’ju shërbejë siç duhet motrave dhe vëllezërve tan”, u shpreh Balla
