DEL DOKUMENTI/ Ku dhe a e ka përfunduar shkollën e lartë Lulzim Basha?

9 March, 2019 F.autor Breaking News, Politikë

Që prej ardhjes së Lulzim Bashës në Shqipëri dhe katapultimit të tij në kupolën e Partisë Demokratike nëpërmejt KOP, veçoria kryesore e tij me të cilën u tentua të bëhej dallimi nga pjesa tjetër e figurave kryesore në PD, ishte edukimi i tij tërësor në Perëndim.

Fillimisht, Lulzim Basha, së bashku me gruan e ardhshme Aurela, kanë marrë një bursë nga “Fondacioni Soros” për të vijuar studimet bachelor pranë Universitetit të Utrecht në Holandë.

Me të mbaruar studimet e ciklit të parë, zoti Basha thuhej se kishte vijuar dhe përfunduar studimet master për të drejten europiane, po në atë Universitet.

Mirëpo dokumentet e një korespondence me Universitetin e Utrecht, të siguruara nga gazeta TemA, tregojnë një panoramë krejt tjetër nga ajo që na është servirur prej Lulzim Bashës deri më sot.

Së pari, Universiteti vërteton se zoti Basha ka nisur studimet në degën e së drejtës holandeze në vitin 1995, por nuk konfirmon në asnjë rast përfundimin e këtyre studimeve, dhe marrjen e diplomës bachelor.

Për më tepër, dokumenti në fjalë tregon se Lulzim Bashës i janë dashur plot 5 vite për të përfunduar vitin e parë të shkollës, që njihet ndryshe si viti ‘propaedeutic year’, ku synohen të merren njohuritë bazë për të vijuar studimet në fushën e caktuar.

Në mënyrë të habitshme, në 1 shtator 2000, në kohën kur Lulzim Bashës minimalisht i nevojiteshin edhe 2 vite të tjera për të përfunduar studimet bachelor, ai manovron dhe paraqet një tjetër diplomë, origjina e së cilës mbetet e paspecifikuar, çka i mundëson atij vijimet e studimeve master në Universitetin e Utrecht, ne degën e së Drejtës Europiane dhe Ndërkombëtare.

Siç mund të shihet qartë, i gjendur para faktit që e kishte të pamundur t’i përfundonte studimet universitare në Utrecht, Lulzim Basha dorëzon një diplomë bachelor të cilën nuk e di njeri se ku e ka marrë, por që i njihet nga Universiteti dhe i lejon atij të vazhdojë studimet master në Utrecht.

Edhe në këtë rast, Lulzim Basha ia arrin t’i zvarrisë për 5 vjet të tjera studimet, në një degë që kohëzgjatjen normale të saj e ka vetëm 1 vit.

Lulzim Basha më në fund arrin të diplomohet në maj 2005, vetëm 1 muaj përpara zgjedhjeve parlamentare në Shqipëri.

Duket se zoti Basha është treguar mjaft i kujdesshëm për të mos i sqaruar faktet e mësipërme, pasi po të vëresh jetëshkrimin e tij të depozituar në Kuvend, në seksionin e arsimimit ai mjaftohet vetëm me: “Diplomuar në “E Drejtë Europiane dhe Ndërkombëtare” ‐ Universiteti i Utrecht‐it, Holandë”.

E njëjta gjë vihet re edhe ne profilin e tij në faqen zyrtare të PD.

Në të dyja rastet, Lulzim Basha nuk e specifikon nëse diploma e cituar prej tij është e nivelit bachelor apo master, dhe nëse është kjo e dyta, cili është institucioni arsimor që i ka lëshuar atij diplomen bachelor dhe pse tenton ta fshehë atë?

Gjithashtu, vlen të theksohet se Lulzim Basha, së bashku më Klevis Balliun, Aldo Bumçin e shumë të tjerë, asnjëherë nuk e kanë paraqitur diplomën për t’u ekuivalentuar pranë Ministrisë së Arsimit, detyrim ky për të gjithë studentët shqiptarë të diplomuar jashtë shtetit, që duan të punojnë në institucione publike.

Ky fakt mbetet shumë shqetësues, sidomos kur për prurjet e reja me përvojë minimale në politikë, të cilët janë reklamuar nga partia si prurje cilësore për shkak të ‘diplomave’ perëndimore, nuk ka asnjë informacion njohës dhe miratues nga Ministria e Arsimit.