Sali Berisha duket se nuk ka pasur argument politik për të kundërshtuar deklaratat e delegacionit të Parlamentit Europian në Tiranë të cilët dënuan vendimin e opozitës për djegien e mandateve duke nënvizuar se po pengojnë integrimin.
Ish kryeministri i ka dalë në mbrojtje lideres së LSI-së Monika Kryemadhi e cila u përplas me eurodeputetin Knut Flackenshtein që i kërkoi largimin e Edi Ramës nga pushteti.
I ftuar në Ora News, Berisha ka sjellë në studio disa thashetheme të “qytetarit dixhital” për të sulmuar diplomatin e lartë të PE.
“Cherchez la femme. Gojët e liga më thonë se ai e sulmoi Monika Kryemadhin një zonjë të nderuar sepse kjo i prishi muhabetet me një vajzë në Tiranë. Kaq ju them unë se nuk tregoj detaje. Unë nuk merrem me biografinë e të tjerëve fare”, u shpreh Berisha.
Artur Zheji e pyet “Mos është fjala për ndonjë ish-ambasadore?”
“Nuk e di! Nuk shkoj aq thellë. Unë them që nuk bëri mirë që i tha ato. Jam i bindur që i nderuari deputet, po t’i gjykonte sonte, do t’i hiqte ato që tha ndaj një zonje, që është kryetare partie“, tha Berisha.
Që pas deklaratave të delegacionit të PE, ndaj eurodeputetit Flackenshtein ka nisur një sulm i fuqishëm si nga aktorët polotik të opozitës po ashtu edhe nga mediat e kontrolluara prej saj.
Le të kujtojmë se ai ka shërbyer si raportuesi i Shqipërisë në Parlamentin Europian dhe ka merita për raportin pozitiv të Shqipërisë në Kēshillin e Europēs. (TemA)
