Një 53-vjeçar ka mbetur i plagosur mbrëmjen e sotme, pasi është qëlluar më armë zjarri me breshëri. Ngjarja ka ndodhur rreth orës 21:15 minuta. Edmond Fejzullahu ka qenë duke lëvizur me makinën e tij tip ‘Benz’ me targa AA 733 EO kur i është zënë pritë.
Pasi e kanë ndjekur, autorët kanë qëlluar disa herë me armë në drejtim të xhamit të parë, vendit të drejtuesit të mjetit ku ndodhej Edmond Fejzullahu. Pamjet e makinës, nga ku duken gjashtë shenja të plumbave në xhamin e parë.
Nga të shtënat, Fejzullahun e kanë kapur dy plumba në gjoks. Pasi zbrasën armën duke menduar se e lanë të vdekur autorët u larguan me shpejtësi, por 53-vjeçari arriti që të shpëtonte dhe të shkonte vetë me makinën e tij drejt spitalit të Fierit.
Aktualisht ai ndodhet nën kujdesin e mjekëve në gjendje kritike për jetën, pasi doli nga salla e operacionit, ndërsa policia ka nisur hetimet për të zbardhur ngjarjen. Deri tani autorët mbeten mister, ndërsa janë sekuestruar kamerat e sigurisë rreth zonës ku ndodhi atentati. Ndërkohë që pritet të merret edhe dëshmia e të plagosurit mbi konfliktet që mund të ketë pasur për të hedhur dritë mbi ngjarjen.
