Dhuna në stadiumet shqiptare është një fenomen i shpeshtë , e si për pasojë klubet dhe lojtarët e përfshirë në këto ngjarje shpeshherë marrin dënime të rënda nga FSHF.
Konfliktet më të rënda janë ato midis ndeshjeve ‘derbi’, të cilat kanë pritshmëri më të mëdha për të degjeneruar në dhunë pasi tensioni është i pashmangshëm, para, gjatë dhe pas ndeshjeve.
Zakonisht në të tilla përballje, autoritetet janë më të mobilizuara për të siguruar mbarëvajtjen e ndeshjeve, por kjo nuk ndodh në kategoritë inferiore të kampionatit shqiptar.
Ja disa nga derbit më të zjarrtë të skuadrave të vogla, të cilat kanë shkaktuar dhunë në stadiumet shqiptare.
Nëntor 2017
Butrinti-Delvina
Derbi midis Butrintit dhe Delvinës njihet gjithashtu si një ndër derbit më të zjarrtë të jugut të Shqipërisë. Edhe pse në kategoritë inferiore, dy skuadrat e qyteteve të Sarandës dhe Delvinës kanë ditur të dhurojnë gjithmonë spektakël, por ana tjetër nuk kanë munguar rastet e dhunës. Rasti më i fundit ishte ndeshja e 27 nëntorit të këtij viti e cila degjeneroi në grushte ndaj arbitrit të ndeshjes, Kreshnik Cjapi për shkak të disa vendimeve të dyshimta të këtij të fundit.
Maj 2016
Korabi-Kastrioti
Ndeshjet mes Korabit të Peshkopisë dhe Kastriotit të Krujës kanë qenë gjithmonë të tensionuara, e si për pasojë edhe dhuna gjatë ndeshjeve nuk ka munguar. Rasti më I bujshëm ka qenë në maj të vitit 2016, kur luhej ndeshja në kategorinë e parë në fushën e Korabit. Ndeshja ishte e tensionuar para dhe gjatë lojës, por tensionet kulmuan me fërshëllimën përfundimtare të gjyqtarit të takimit, fërshëllimë që në vend që të nxirrte jashtë futbollistët, hodhi në fushë tifozët vendas.
Këta të fundit u vërsulën me grushte, shkelma dhe sende të tjera të forta me një shënjestër të vetme, lojtarët e Kastriotit.
Një nga ata që e pësoi më keq ishte Erlind Korreshi, i cili, siç shihet nga pamjet, ka marrë disa dëmtime në kokë.
Dhjetor 2017
Përmeti-Këlcyra
ESKLUZIVE🚨Dhunë në ndeshjen Përmeti-Këlcyra (kategoria dytë). Futbollistët dhe stafi i Këlcyrës kanë sulmuar arbitrin e ndeshjes Albi Paco pasi ky i fundit ka dhënë penallti për Përmetin. Ndeshja është ndërprerë për të mos filluar më.
Posted by Procesi Sportiv on Sonntag, 10. Dezember 2017
Dhe e fundit por jo nga rëndësia është derbi midis Përmetit dhe Këlcyrës, i cili ditën e djeshme degjeneroi në dhunë ndaj arbitrit, për shkak të disa vendimeve të dyshimta nga ana e tij, të cilat nuk janë pranuar nga ana e ekipit të Këlcyrës duke shkaktuar tensione të mëdha në fushë.
Ditën e sotme policia arrestoi 3 nga futbollistët e Këlcyrës të cilët goditën arbitrin, por tifozët dhe skuadra e Këlcyrës kundërshtuan këtë vendim nga ana e autoriteteve dhe protestuan duke bllokuar rrugën nacionale Përmet-Këlcyrë. Gjithashtu tifozët kërkuan lirimin e futbollistëve dhe në të kundërt paralajmëruan se do të futeshin në grevë.
