Bekim Kafexholli, avokat i Vesel Veselit, i dyshuar për keqpërdorimin seksual të 16-vjeçares nga Drenasi, ka konfirmuar dje për Insajderin, se klienti i tij sot pritet të merret ne pyetje nga prokurori.
Kafexholli ka thënë se deri më tani nuk është informuar në mënyrë zyrtare asgjë sa i përket rastit. Ai ka shtuar se përveç urdhrit për arrestim të klientit të tij (Vesel Veseli) nuk ka ende asgjë zyrtare sa i përket arsyeve pse ai është arrestuar.
“Nesër ai pritet me dalë para Prokurorit të lëndës”, ka thënë Kafexholli.
Insajderi, të martën, ka raportuar për një abuzim seksual të një 16-vjeçare në Drenas.
Vesel Veseli, i cili mbante postin e zv.shefit të hetimeve në Policinë e Drenasit, dyshohet se e kishte abuzuar seksualisht një 16-vjeçare nga kjo komunë.
Veseli dyshohet se e ka shtyrë 16-vjeçaren që të abortojë pa dëshirën e saj.
E gjithë kjo ngjarje ka ngjallur reagime të shumta në shoqërinë kosovare. Për të kanë reaguar edhe krerët më të lartë të institucioneve kosovare.
